Астанага келаётган хорижлик меҳмонларга волонтёрлар Қозоғистон байроқлари ва шоколадларни совға қилишди.
Акциядан мақсад — хорижлик меҳмонларни Қозоғистон билан таништириш ҳамда уларга миллий байрам шукуҳини ҳис эттириш.
Акция иштирокчиларидан бири Иорданиядан келган, Wrestling for Peace ташкилоти президенти Дэн Рассел бўлди. У Астанага кураш бўйича жаҳон чемпионатида иштирок этиш учун келган. Шунингдек, у Қозоғистонда аввал ҳам, Бутунжаҳон кўчманчилар ўйинлари вақтида бўлганини таъкидлади.
“Бу ажойиб инсонлари ва бетакрор маданиятига эга гўзал маскан. Бу ерда ҳаётни ва спортни чин дилдан севадиган инсонлар яшайди”, — деди Рассел ўз таассуротлари билан ўртоқлашар экан.
У аввалги сафари давомида курашнинг турли йўналишларини кузатиш унга айниқса ёққанини айтди. Меҳмоннинг сўзларига кўра, у дунёнинг турли мамлакатларидан келган энг кучли курашчилар чемпионлик унвони учун беллашаётган Астанага яна қайтиб келганидан хурсанд.
Сўзининг якунида Рассел қозоғистонликларни Республика куни билан табриклаб, мамлакатга фаровонлик тилади.
Эслатиб ўтамиз, Республика куни муносабати билан Астанaдa 120 дан ортиқ маданий-оммавий, таълим, спорт, экологик ва ижтимоий тадбир ўтказиш режалаштирилган. Байрам дастуридан концертлар, кўргазмалар, спектакллар, тематик учрашувлар, танловлар, спорт мусобақалари ва турли акциялар ўрин олган.