Атом энергияси Франция электр энергиясининг тахминан 70 фоизини таъминлайди. Аномал иссиқ ва қурғоқчилик бу йил атом электр станцияларининг ишини бир неча бор тўхтатди.
EDF энергетика компанияси маълумотларига асосланган AFP хабарига кўра, чоршанба куни Франция атом электр станцияларининг 20,4 фоизи ишламай қолди. Бу "экологик чекловлар" ва "ташқи атроф-муҳит омиллари" туфайли янги рекорддир.
Франциянинг 57 та ядро реакторидан 13 таси ёпилди. Улардан 8 таси тўлиқ ёпилди, қолган 5 таси эса камайтирилган қувватда ишламоқда.
Электр қувватининг пасайишига Ғарбий Европадаги энг катта Gravelines атом электр станциясидаги вазият таъсир кўрсатди. Унинг 6 та реакторидан 5 таси тўлиқ ёки қисман ёпилди. Бу совутиш тизими насосларида медузалар тўпланиши билан боғлиқдир.
EDF вакилининг сўзларига кўра, "бир неча тонна медузалар" денгиз сувини тортадиган насос станцияларига тушиб, фильтр тизимларини тиқилиб қолган. Завод ускуналарини совутиш учун Шимолий денгиз сувидан фойдаланади. Худди шундай ҳолат бир йил олдин Gravelines атом электр станциясида ҳам содир бўлган.
Мутахассисларнинг таъкидлашича, балиқ овлашнинг ҳаддан ташқари кўплиги, пластик ифлосланиш ва иқлим ўзгариши туфайли денгиз сувларининг исиши медузалар кўпайиши учун қулай шароит яратган.
Бошқа атом электр станцияларидаги ишларнинг тўхтатилиши ва қувватнинг пасайиши иссиқлик ва қурғоқчилик туфайли юзага келган. Дарёлардаги сув сатҳининг пасайиши ва ҳароратнинг кўтарилиши билан EDF атроф-муҳит ва биологик хилма-хилликни ҳимоя қилиш учун электр энергияси ишлаб чиқаришни камайтиришга ёки бутунлай тўхтатишга мажбур бўлиши мумкин.
Colombus Consulting компаниясининг энергетика бўйича мутахассиси Николя Голдбергнинг айтишича, Франция ҳали электр энергияси танқислигига дуч келмаяпти. Электр энергияси истеъмоли одатда август ойида пасаяди ва мамлакат электр энергиясининг асосий экспортчиси бўлиб қолмоқда.
Бироқ, эксперт кейинги 20-30 йил ичида иқлим ўзгариши туфайли эски ядровий реакторларнинг янги шароитларга мослашиши Франция энергетика сектори учун жиддий муаммога айланиши мумкинлиги ҳақида огоҳлантирди.
Эслатиб ўтамиз, Франция ҳудудининг 85 фоизи иссиқ ҳаво туфайли қурғоқчиликдан зарар кўрди.