Алмати кўчалари 2030 йилгача камералар ва ёритиш ускуналари билан жиҳозланади
Асқар Амрин шаҳардаги ҳуқуқбузарликларнинг учдан бир қисмидан кўпроғи жамоат жойлари ва кўчаларда содир этилишини маслихат йиғилишида айтди. Бунинг сабабларидан бири, унинг фикрича, сифатсиз ёритиш ёки жамоат жойларида унинг тўлиқ йўқлиги. Бугунги кунда шаҳар кўчалари ва ҳовлиларининг 20 фоизи кўчаларни ёритиш билан таъминланмаган.
– Умуман олганда, 2030 йилгача янги ёритиш линиялари қуриш, ёруғлик нуқталарини ўрнатиш ва эскирган лампаларни янги LED лампаларга алмаштириш ҳисобига кўчалар, йўллар ва ҳовлилар сифатли ёритиш билан тўлиқ таъминланади. Кўчаларни комплекс реконструкция қилишга ёндашув жорий этилади – ёруғлик, видеокузатув, пиёдалар зонаси, дренаж, ободонлаштириш ва велосипед йўлакчаси», — дейилади ҳоким ўринбоспари маърузасида.
Унга кўра, турли мулкчилик шаклидаги ташкилотларга қарашли объектларда ўрнатилган 128 мингдан ортиқ видеокузатув камераларининг атиги 23,9 фоизи ички ишлар бошқармасининг Тезкор бошқарув маркази билан интеграциялашган.
«Мавжуд видеокузатув тизимлари ўз муаммоларини ҳал қилиш учун жорий этилган ва турли платформаларда алоҳида ишлайди. Жорий йилда «Алмати шаҳрининг алоҳида мақоми тўғрисида»ги қонунни амалга оширишда хусусий видеокузатув тизимларини ягона бошқарув хонасига бирлаштириш қоидалари қабул қилинади. Албатта, эгасининг розилиги билан. Хавфсизликни таъминлаш мақсадида 2025 йилга бориб «ақлли» видеотаҳлил тизимларининг барча имкониятларидан фойдаланган ҳолда видеокузатув билан таъминланмаган объектларга 7000 та видеокузатув камералари ўрнатилади», — дея қўшимча қилди Асқар Амрин.
Шунингдек, 2024-йилга келиб одамлар гавжум жойларда «SOS тугмаси» фавқулодда аудио/видео қўнғироқлар тизимлари ўрнатилади. Шаҳарнинг барча туманларида 2023 йилда «полимарказлик» тамойили бўйича «Полиция хизматлари марказлари»нинг дастлабки 8 та пункти очилади. Марказларда нафақат полиция ходимлари, балки психологлар, медиаторлар, болалар хоналари ва ҳоказолар ҳам бўлади. 2030 йилга бориб «пиёда масофа» тамойили бўйича замонавий жиҳозланган 30 та полиция участкаси очилади.
«Ушбу чора-тадбирларнинг амалга оширилиши 2025 йилда жиноятлар сонини ҳар 10 минг аҳолига 165 тага, 2030 йилга бориб эса 10 минг кишига 150 тага камайтириш имконини беради; аҳолининг полицияга ишонч даражасини 2025 йилда 50 фоизга, 2030 йилда 80 фоизга ошириш; шахсий, мулкий ва жамоат хавфсизлигини ҳис қилишни 2025 йилда 80 фоизга, 2030 йилда 88 фоизга ошириш», — дея қўшимча қилди Асқар Амрин.
Муаллиф: Еламан Турисбеков