Кучли ёмғирлар туфайли дарёлар ўзанидан тошиб, бир қатор аҳоли яшаш пунктларини сув босган.
Индианаполис шаҳрида фавқулодда вазиятлар хизмати дам олиш кунлари сувда қолган одамларни қутқариш учун 56 марта операция ўтказган. Юзлаб турар жойлар ва бошқа бинолар сув остида қолган.
Айрим ҳудудларда ёғингарчилик миқдори 11 дюймдан, яъни тахминан 280 миллиметрдан ошган. Уайт-Ривер дарёсидаги сув сатҳи айрим жойларда тарихдаги энг юқори кўрсаткичга етган.
Кучли довул ва сув тошқини энергетика инфратузилмасига ҳам зарар етказган. Офат авж олган пайтда штатда тахминан 130 минг истеъмолчи электр энергиясиз қолган.
Ҳозир айрим ҳудудларда сув сатҳи пасая бошлаган бўлса-да, ҳокимият аҳолини эҳтиёткор бўлишга чақирмоқда. Сув босган йўллар ва зарар кўрган инфратузилма ҳали ҳам хавф туғдирмоқда.
АҚШ президенти Дональд Трамп Индиана штатига федерал фавқулодда ёрдам кўрсатиш тўғрисидаги декларацияни маъқуллади. Бу зарар кўрган ҳудудларда тиклаш ишлари учун федерал ресурсларни жалб этиш имконини беради.
Маҳаллий ҳокимият ва фавқулодда вазиятлар хизматлари зарар кўрган ҳудудларда талафот кўламини баҳолаб, тиклаш ишларини давом эттирмоқда.