2026 йил 10 сентябрдан кучга кирадиган учишга яроқлилик тўғрисидаги директива (The Airworthiness Directive) айрим Boeing 737 Max 8, Max 9 ва Max 8-200 самолётларига тааллуқли бўлиб, АҚШда рўйхатдан ўтган тахминан 471 та самолётни қамраб олади.
Бундай қарорга фюзеляж қопламаси ва маҳкамлаш тасмасида аниқланган ёриқлар сабаб бўлган. Бу нуқсонлар асосий конструктив элементнинг юқори юкламаларга чидамлилигини пасайтириши ва самолётнинг умумий конструкциявий мустаҳкамлигига салбий таъсир кўрсатиши мумкин.
Америка корпорацияси маълум қилишича, мазкур муаммо илк бор 2019 йилда айрим Boeing 737 Next Generation самолётларида аниқланган. 737 Max самолётлари эса ўхшаш конструкция ва ишлаб чиқариш жараёнига эга.
Boeing муаммонинг асл сабабини аниқлаш учун муҳандислик таҳлилини ўтказди ва бундай носозликларнинг олдини олишга қаратилган ўзгартишларни ишлаб чиқариш жараёнига жорий этмоқда.
Аввалроқ Пентагон ва Boeing умумий қиймати 7 миллиард АҚШ долларидан ортиқ бўлган шартномаларни имзолагани ҳақида хабар берилган эди.