2022-2026 йиллар давомида минглаб клиникалардан олинган маълумотларга асосланган Guidepoint Qsightнинг янги ҳисоботига кўра, эркаклар эстетик муолажалар бозорининг тобора муҳим аудиториясига айланмоқда.
2026 йилнинг учинчи чорагида эркакларнинг битта муолажа учун ўртача харажатлари рекорд даражага — 529 долларга етди. Аёллар эса ўртача 455 доллар сарфлаган. Бу фарқ эркаклар учун препаратлар қимматроқ экани билан эмас, балки бир ташриф давомида тахминан 10-15 фоиз кўпроқ препарат ишлатилиши билан изоҳланади.
Эркакларнинг нейротоксинларга сарфлайдиган маблағларининг энг катта қисми АҚШнинг ғарбий штатларига тўғри келади — тахминан 40 фоиз. Аёлларда эса бу кўрсаткич қарийб 30 фоизни ташкил этади. Шу билан бирга, мамлакатнинг Ўрта Ғарб ва Шимоли-Шарқий ҳудудлари янги эркак мижозларни жалб этиш учун истиқболли минтақалар бўлиб қоляпти.
Ёш тоифалари бўйича X авлодига мансуб эркаклар (1965-1980 йилларда туғилганлар) етакчилик қиляпти. Бироқ миллениаллар (1981-1996 йилларда туғилганлар) орасида ҳам бундай муолажаларга қизиқиш фаол ошиб боряпти. Улар ушбу муолажаларни олаётган эркак беморларнинг 36 фоизини ташкил этади.
Z авлоди (1995-2010 йилларда туғилганлар) ва миллениаллар ҳам нейротоксин инъекцияларини биринчи марта қабул қилиш учун мурожаат қилаётган янги беморларнинг ярмидан кўпини ташкил қилган. Бу ёш эркаклар орасида эстетик тиббиётга қизиқиш ортиб бораётганидан далолат беради.
2026 йилда эркаклар орасида кузатилган кўрсаткичларнинг ўсиши вақтинчалик ўзгариш бўлиши ҳам мумкин. Агар бу тенденция кейинги чоракларда ҳам сақланиб қолса, клиникалар эркаклар учун хизматлар йўналишини ривожлантиришда қўшимча имкониятларга эга бўлади. Бу, энг аввало, шахсий эҳтиёжларга мослаштирилган муолажалар, мақсадли маркетинг ва талаб ҳозирча паст бўлган ҳудудларда янги мижозларни жалб этиш ҳисобига амалга ошиши мумкин.