Янги портал фуқароларнинг федерал давлат органлари билан ўзаро алоқасини соддалаштириши керак. Фойдаланувчилар зарур хизматни ҳар бир давлат органининг алоҳида сайтларидан изламасдан, America.gov портали орқали топишлари мумкин. Бу ерда тизимга кириб, зарур маълумотларни олиш, шунингдек, тегишли хизмат онлайн тарзда мавжуд бўлса, уни шу ернинг ўзида расмийлаштириш мумкин.
Порталга кириш учун федерал давлат органлари фойдаланувчиларнинг шахсига оид маълумотларни тасдиқлашда фойдаланадиган Login.gov тизими жорий этилади.
Ушбу тизимга ҳар йили 100 мингдан ортиқ киши фойдаланадиган ва онлайн тарзда тақдим этиладиган федерал давлат хизматлари киритилади. Бироқ бунга АҚШ Солиқ хизмати томонидан кўрсатиладиган солиқ декларацияларини топшириш хизматлари, шунингдек, Мудофаа вазирлиги ва Америка разведка ҳамжамиятининг хизматлари киритилмайди.
Фармонда давлат рақамли хизматларининг сифати, фойдаланиш имконияти, хавфсизлиги ва қулайлигига қўйиладиган ягона талаблар ҳам белгиланган. Ҳукумат шахсий маълумотларни тўплашни имкон қадар камайтириш ва фойдаланувчилар шахсини тасдиқлашнинг хавфсиз тизимини таъминлашни мақсад қилган.
Шу билан бирга, федерал давлат органлари ўз тизимлари, ҳужжатлари ва ваколатлари устидан назоратни сақлаб қолади. America.gov портали ишга туширилгани билан фуқаролар ҳақида ягона марказлаштирилган маълумотлар базаси яратилмайди.
Америкаликлар давлат хизматларидан аввалгидек бошқа усуллар орқали — давлат муассасаларига шахсан бориб, телефон орқали, почта орқали ёки тегишли идораларнинг махсус сайтлари орқали фойдаланишлари мумкин. America.gov портали фуқароларнинг давлат билан алоқасининг ягона механизми эмас, балки давлат хизматларидан фойдаланишнинг қўшимча ва қулай воситасига айланади.
Фармон имзоланганидан кейин 90 кун ичида АҚШнинг Маъмурият ва бюджет бошқармаси федерал идоралар учун йўриқнома тайёрлаши керак. Шундан сўнг идоралар порталга киритиладиган хизматларни белгилаб, уларни хавфсизлик ва махфийлик талабларига мувофиқ America.gov тизимига улайди.
Давлат органлари порталга уланган хизматлардан фойдаланиш ва уларнинг самарадорлиги ҳақидаги маълумотларни ҳам мунтазам равишда тақдим этиб бориши шарт бўлади.
Фармон амалдаги қонунчиликка мувофиқ ва зарур маблағлар ажратилган тақдирда амалга оширилади.
Эслатиб ўтамиз, аввалроқ АҚШ Марказий Осиё мамлакатларида киберхавфсизликни ривожлантириш учун 5 миллион доллар ажратгани ҳақида хабар берилган эди.