АҚШ Давлат департаменти мамлакат ичидаги ва хориждаги барча элчихона ҳамда консуллик ходимлари учун глобал ўқув дастурини ишга туширди. Шу муносабат билан виза олиш учун ариза берувчиларни қабул қилиш жадвали ўқув дастури талабларига мувофиқ қайта кўриб чиқилади.
Суҳбатга олдиндан ёзилиб қўйган ариза берувчиларга электрон почта орқали учрашувлари бекор қилингани ҳақида хабар юборилади. Шунингдек, уларга суҳбатнинг янги санаси ва вақти кейинроқ маълум қилиниши айтилган.
Ушбу чора Дональд Трамп маъмуриятининг иммиграция назоратини кучайтириш сиёсати доирасида қабул қилинган. Мазкур сиёсат виза ва грин-карта учун ариза берувчиларни янада синчиклаб текшириш, депортация кампаниясини кучайтириш ҳамда қочқинларни қабул қилиш тартибини қайта кўриб чиқишни ўз ичига олади.