Расмий маълумотларга кўра, 2025 йил охирига келиб Пекинда 60 ёшдан ошган аҳоли сони 5,288 миллион нафарга етган. Бу шаҳар аҳолисининг 24,3 фоизини ташкил этади.
Демографик ўзгаришлар шаҳар маъмуриятини ижтимоий ва соғлиқни сақлаш инфратузилмасини ислоҳ қилиш ишларини жадаллаштиришга ундамоқда. Йил бошида «Пекинда кексаларга ғамхўрлик кўрсатиш хизматлари тўғрисида»ги низом кучга кирди ва уч босқичли ижтимоий хизмат кўрсатиш тармоғини ташкил этиш расман тасдиқланди.
Ҳозирги вақтда Пекинда кексаларни парвариш қилишга мўлжалланган 620 та ижтимоий муассаса, 168 та туман маркази ҳамда жами 155 минг ўринга эга бўлган 1 500 дан ортиқ маҳаллий хизмат кўрсатиш маскани мавжуд.
Хизмат кўрсатиш жойларига пиёда етиб бориш имкониятини ошириш мақсадида шаҳарда кекса ёшдагилар учун тахминан 3 000 та ихтисослаштирилган парвариш ва овқатланиш маркази ташкил этилган. Улар шаҳар ва қишлоқ аҳоли пунктларининг 90 фоизини қамраб олади. Келгуси уч йилда ҳокимият профессионал парвариш кўрсатиш учун мўлжалланган 30 мингта ўрин ташкил этишни режалаштирмоқда.
2026-2030 йилларда амалга ошириладиган 15-беш йиллик режа кексалар учун 60 мингта ўринни субсидиялаш, ҳамширалар парваришига мўлжалланган ўринлар улушини 73 фоизгача ошириш ва деменция билан касалланган беморлар учун ихтисослаштирилган бўлимлар ташкил этишни назарда тутади. 2030 йилга келиб иккинчи ва ундан юқори даражадаги шаҳар шифохоналарининг 95 фоизидан ортиғида гериатрия бўлимлари фаолият юритиши кутилмоқда.