Жанубий Корея жануби-шарқидаги ўрмон ёнғинлари бутунлай ўчирилди
ASTANA. Kazinform – Жанубий Корея ҳукумати 21 мартдан бери давом этаётган ўрмон ёнғинини тўлиқ ўчирди. Бу ҳақда мамлакат ички ишлар ва хавфсизлик вазирлиги маълум қилди, деб хабар беради ТАСС.
Ички ишлар вазири вазифасини бажарувчи Ко Ки Дон бошчилигидаги Кёнсан-Пукто, Кёнсан-Намдо провинциялари ва Ульсан шаҳрида (илгари фавқулодда ҳолат жорий этилган) йиғилишда ёнғиннинг олдини олиш чоралари муҳокама қилинди.
“Бугун (30 март) маҳаллий вақт билан соат 13:00да (Астана вақти билан 09:00) Кёнсан-Намдо провинциясининг Санчхон округидаги асосий ёнғин тўлиқ ўчирилди. Бу ерда ёнғин 21 март куни бошланган. Шундай қилиб, жами 11 та ёнғин ўчирилди”, – дейилади вазирлик хабарида.
Маҳаллий оммавий ахборот воситаларининг ҳисоб-китобларига кўра, ёнғин 48 минг гектар майдонни ёқиб юборган, бу Сеул ҳудудининг тахминан 80 фоизини ташкил қилади. Ко Ки Дон ёнғинни мамлакат тарихидаги энг даҳшатли офатлардан бири деб атади, чунки у инсоний қурбонлар ва моддий зарар жиҳатидан ниҳоятда оғир бўлди.
Охирги маълумотларга кўра, 30 киши ҳалок бўлган, 45 киши яраланган. Ёнғин 30 та маданий мерос обектини вайрон қилди, деб хабар беради Yonhap ахборот агентлиги.
30 март куни Жанубий Корея ўрмон хизмати Кёнсан-Пукто провинциясидаги ёнғин тўлиқ ўчирилганини маълум қилди. Бироқ шанба оқшомида ёнғин яна аланга олди. Бундан ташқари, Жанубий Корея полицияси 56 ёшли маҳаллий аҳолига нисбатан тергов ишларини бошлаган. У 22 март куни Йисун туманидаги оилавий қабристонда аждодларни хотирлаш маросимида ёнғин қўйганликда гумон қилинмоқда.
Эслатиб ўтамиз, бунгача Жанубий Кореядаги ўрмон ёнғинларида камида 18 киши ҳалок бўлганини ёзган эдик.
