Ўзбекистонда сайёҳларга 24 соат давомида хизмат кўрсатувчи мобиль бозор ишга тушди

TASHKENT. Kazinform - Ўзбекистоннинг туризм салоҳиятидан самарали фойдаланиш ва сайёҳларга қулайликлар яратиш мақсадида Бухоро шаҳрида ҳафтада 7 кун 24 соат давомида хизмат кўрсатувчи мобиль бозор фаолияти йўлга қўйилди, деб хабар беради Kazinform Халқ сўзига таяниб.

Сўнгги йилларда Ўзбекистон бўйлаб сайёҳлик масканларининг инфратузилмасини ривожлантириш, янги туристик йўналишлар ва маҳсулотларни жорий қилиб, соҳадаги илғор хорижий тажрибани татбиқ этишга эътибор қаратиляпти.

Бухоро шаҳридаги М.Иқбол кўчасида «Тунги мобиль бозор» фаолиятининг йўлга қўйилиши эса хорижлик ва маҳаллий сайёҳлар учун ҳудудларда туризм хизматлари турларини ошириш ва шу мақсадда туризм объектларининг инфратузилмасини тубдан яхшилаш, хусусан, улар учун мамлакатнинг бой моддий ва номоддий маданий мероси билан яқиндан таништириш имкониятини беради.

Қайд этиш жоизки, маскандаги ҳар бир иншоот Бухоро, Тошкент, Самарқанд, Хоразм, Қашқадарё вилоятларининг рамзий дарвозалари макети кўринишида қурилган. У ерда ўзбек миллий таомларини тайёрлайдиган умумий овқатланиш шохобчалари, сувенирлар сотиладиган дўконлар, ҳунармандчилик расталари – барчаси бу ерга келаётган сайёҳларнинг ҳайратини бир неча карра оширади. Шунингдек, «Тунги мобиль бозор» ўзига хос тематик услубдаги ёритиш мосламалари билан таъминланган.

Миллий услубда барпо этилган, савдо-сотиқни юритиш учун барча шароит ва имкониятлар йўлга қўйилган маскан шу кунларда Бухоро шаҳри аҳолиси ва меҳмонлари билан гавжум.