Ўзбекистон Қозоғистонга 4,1 млн жуфт оёқ кийим экспорт қилган

TASHKENT. Kazinform -2023 йилнинг январь-апрель ойларида 11 та хорижий давлатга юртимизда ишлаб чиқарилган қиймати 12,5 миллион долларлик 8,4 миллион жуфт оёқ кийимлар экспорт қилинган, деб хабар беради Kazinform қўмитанинг расмий Telegram-каналига таяниб.

ЎР Статистика агентлигининг дастлабки маълумотларига кўра, Ўзбекистон Қозоғистонга 4,1 миллион жуфт, Қирғиз Республикасига 2,4 миллион жуфт, Тожикистонга 1,3 миллион жуфт ва Россияга 228 минг жуфт оёқ кийим экспорт қилган. Шу тариқа ушбу давлатлар оёқ кийим импортёрлари сифатида асосий харидорларимиз рўйхатининг юқори қисмидан жой олган.

Оёқ кийимлар экспорти борасида ҳудудий таҳлилларга эътибор қаратадиган бўлсак, Андижон, Самарқанд, Фарғона ва Хоразм вилоятлари етакчи эканини кўриш мумкин. Жумладан, ушбу даврда Андижон вилоятидан қиймати 5,6 миллион, Самарқанд вилоятидан эса 2,2 миллион долларлик пойабзаллар экспортга йўналтирилган бўлса, фарғоналик ишлаб чиқарувчилар 2 миллион, хоразмликлар эса 1,3 миллион долларлик маҳсулотини хорижга экспорт қилган.