Ўзбекистонда пенсияни аризасиз — автоматик тарзда тайинлаш тизимига ўтилади
TASHKENT. Kazinform – Олий Мажлис Қонунчилик палатаси 13 февралдаги йиғилишида «Проактив пенсия тайинлаш тизимига ўтиш тўғрисида»ги қонунни биринчи ўқишда қабул қилди, деб хабар беради Kazinform ЎР парламенти қуйи палатаси матбуот хизматига таяниб.
Ушбу қонун лойиҳаси билан «Фуқароларнинг давлат пенсия таъминоти тўғрисида»ги қонунга пенсия олиш ёшига тўлган (эркаклар 60 ёш, аёллар 55 ёш) фуқароларга ёшга доир пенсияни уларнинг алоҳида мурожаатини талаб этмаган ҳолда проактив шаклда тайинлаш тартибини белгилашга оид ўзгартириш ва қўшимчалар киритилмоқда.
Ҳозирда фуқаролар пенсия олиш учун ариза бериши ва тўловларга бўлган ҳуқуқларини тасдиқловчи ҳужжатларни тақдим этиши керак. Эндиликда бу жараён тегишли вазирлик ва идоралар ўртасида ахборот алмашинуви доирасида автоматлаштирилади.
ЎР Иқтисодиёт ва молия вазири ўринбосари Гулнора Раҳимова мазкур ўзгаришлар туфайли йилига ўртача 250 минг нафар фуқаронинг Пенсия жамғармаси ва давлат хизматлари марказларига мурожаат қилишига тўғри келмаслиги, бу эса вақт ва маблағни тежаш имконини бериши ҳақида маълум қилди.
«Қонун лойиҳасининг қабул қилиниши аҳолига пенсия тайинлаш тизимига замонавий рақамли технологияларни фаол татбиқ этган ҳолда, давлат томонидан кўрсатилаётган хизматлар сифатини янада оширишга хизмат қилади», — дейилади хабарда.
Ўзбекистон президентининг 2023 йил 31 октябрдаги қарорига мувофиқ, 2025 йил 1 мартдан пенсия тайинлашнинг проактив шаклини ишга тушириш режалаштирилган. Шунингдек, 1 мартгача фуқароларга пенсия тайинланиши ёки пенсия миқдорига таъсир қилувчи қўшимча ҳужжатларни тақдим этиш юзасидан фуқаронинг мобиль алоқа воситасига SMS-хабар юбориш тартиби жорий этилади.
Эслатиб ўтамиз, аввалроқ Ўзбекистонда камбағал оилалар реестрига киритилганларга махсус субсидиялар берилиши ҳақида ёзган эдик.
