Туркияда инфляция 40 фоиздан пастга тушди
Жорий йилнинг февраль ойида Туркияда инфляция даражаси ойлик ҳисобда 2,27 фоизга ўсди ва йиллик ҳисобда 39,05 фоизгача пасайди, дея хабар беради Kazinform агентлиги мухбири.
Туркия Статистика ташкилоти (ТÜİК) расмий маълумотларига кўра, 2025 йил февраль ойида ўлкада инфляция ўтган ойга нисбатан 2,27 фоизни ташкил этди. Шу билан бирга, ўтган йилнинг шу даврига нисбатан инфляция даражаси 39,05 фоизгача пасайди, бу аввалги даврларга нисбатан сезиларли яхшиланишдир.
Мутахассисларнинг таъкидлашича, бу натижа Туркия ҳукуматининг юқори инфляция билан курашини давом эттираётганидан далолат беради ва нархларни барқарорлаштиришга қаратилган иқтисодий чоралар таъсирини акс эттиради.
Бироқ, йиллик инфляциянинг пасайиши иқтисодий вазиятнинг бироз яхшиланганидан далолат берса-да, Туркияда товар ва хизматлар нархларининг ўсиш даражаси ҳамон юқорилигича қолмоқда. Бу иқтисодиёт ва фуқароларнинг харид қобилиятига босим ўтказишда давом этмоқда.
Иқтисодчилар ва таҳлилчилар келгуси ойларда инфляция пасайишда давом этишини кутишмоқда.
Шу билан бирга, аввалроқ мамлакат Марказий банки раҳбари Фотиҳ Карахан инфляция бўйича ҳисобот тақдим этган бўлиб, унда 2025 йил учун инфляция прогнози 21 фоиздан 24 фоизга ошгани маълум қилинган эди.
Унинг таъкидлашича, 2026 йил учун 12 фоизлик прогноз сақланиб қолмоқда, 2027 йил учун эса 8 фоиз белгиланган. Карахан, 2025 йил учун прогноз қилинган диапазон 19 дан 29% гача ва 2026 йил учун 6 дан 18% гача бўлишини қўшимча қилди.
Аввалроқ Туркия иқтисодиётидаги салбий кўрсаткичлар фонида Туркия аҳолисининг 57 фоизининг қарзлари ва молиявий муаммолари борлигини ёзган эдик.
