Тошкентда Француз мусиқаси фестивали бўлиб ўтади

TASHKENT. Kazinform - 11−30 апрель кунлари Тошкентда Ўзбекистон Давлат консерваторияси, Франция элчихонаси ва Давлат симфоник оркестри ҳамкорлигида ташкил этиладиган Француз мусиқаси фестивали бўлиб ўтади, дея хабар беради Kazinform агентлиги Gazeta.uzга таяниб.

Тадбирда 200 дан ортиқ мусиқачилар иштирок этади. Консерватория саҳнасида симфоник, камер ва вокал-инструментал мусиқадан иборат 10 га яқин концерт намойиш этилади. Дастур доирасида мусиқа мактаблари ўқувчилари ва консерватория талабалари учун халқаро маҳорат дарслари ҳам ўтказилади.

Шунингдек, мусиқа санъати ривожи ва унинг замонавий мусиқа таълимига таъсирига бағишланган талабалар учун ва халқаро илмий-амалий конференция бўлиб ўтади.

Фестиваль француз дирижёри Натали Марен бошчилигидаги Давлат симфоник оркестрининг концерти билан очилади ва у икки кун давомида Ўзбекистон давлат консерваториясининг Қорақалпоғистондаги Нукус филиалида маҳорат сабоқларини ўтказади.

Фестиваль дастурида Морис Равель (150 йил аввал туғилган), Поль Дюка (160 йил), Габриэль Форе (180 йил), Шарль Сен-Санс (190 йил) ва бошқа француз бастакорларининг асарлари ижро этилади.

Ўзбекистон давлат консерваторияси талабалари кўплаб профессор-ўқитувчилар, жумладан, доцентлар Татьяна Мякушко, Жавлон Ражабов, профессорлар Рамида Пўлатхонова, Малика Қосимова ва бошқалар билан ҳамкорликда бой концерт дастури тайёрлаган.

Франциялик пианиночи Франсуа Шаплен, органчи ва бастакор Жан-Батист Робин, шунингдек, етакчи ўзбек пианиночилари Эльмира Мирқосимова ва Адиба Шариповалар яккахон дастурлар билан чиқишади.

Фестиваль Ўзбекистон халқ артисти Камолиддин Ўринбоев бошчилигидаги Давлат симфоник оркестри концерти билан якунланади.

Эслатиб ўтамиз, аввалроқ Ўзбекистон ва Франция ўртасида стратегик шериклик декларацияси имзолангани ҳақида хабар берган эдик.