Соврин жамғармаси - 100 минг доллар: Алматида дзюдо бўйича халқаро мусобақа ўтказилади

21 декабрь куни Алмати шаҳрида дзюдо бўйича эркаклар ўртасида «Jenys Cup» биринчи халқаро жамоавий турнири бўлиб ўтади, деб хабар беради Kazinform.

Қозоғистон Республикаси Миллий олимпия қўмитаси матбуот хизмати хабарига кўра, жамоавий мусобақа эркаклар ўртасида 66 кг, 73 кг, 81 кг, -90 кг, +90 кг вазн тоифаларида бўлиб ўтади.

Бугунги кунга қадар мусобақада Қозоғистон, Туркия, Франция, Россия, Беларусь, Ўзбекистон, Тожикистон, Қирғизистон, Грузия, Испаниядан 17 та клуб рўйхатдан ўтган.

Мусобақа регламентига кўра, ҳар бир вазн тоифасидаги жамоалар давра тизимида ўзаро тўқнаш келади.

Иштирокчилар орасида Олимпия ўйинлари совриндорлари Гурам Тушушвили (Грузия), жаҳон ва Осиё чемпионлари Лука Майсурадзе (Грузия), Шалва Гурешидзе (Грузия), Сомон Маҳмадбеков (Тожикистон), Басху Йондонпэрэнлэйн (Мўғулистон) ҳамда жаҳон Grand Slam ва халқаро турнирлар ғолиб ва ​​совриндорлари Одхюгийн Цэцэнцэнцэнгэль (Мўғулистон), Якуб Шамилов (Россия), Айбек Серикбаев (Қозоғистон), Шахрам Аҳадов (Ўзбекистон), Кубаничбек Айбекуулу (Қирғизистон), Хўжазода Беҳруз (Тожикистон), Карамат Гусейнов (Озарбайжон).

«Jenys Cup» турнирининг умумий мукофот жамғармаси 100 000 АҚШ долларини ташкил этади: 1-ўрин – 30 000 АҚШ доллари, 2-ўрин – 20 000 АҚШ доллари, иккита 3-ўрин учун ҳар бирига 10 000 АҚШ доллари миқдорида мукофот берилади.

Бундан ташқари, мусобақа давомида энг яхши дзюдочи, энг яхши жамоавий спортчи аниқланади ва махсус молиявий мукофотлар топширилади.

Мусобақа 21 декабрь куни Алмати шаҳрида соат 9:00да бошланади.