Шимолий Македониядаги ёнғин билан боғлиқ ўн киши ҳибсга олинди

ASTANA. Кazinform – Полиция Шимолий Македониядаги тунги клубда содир бўлган ёнғин бўйича тергов доирасида 10 кишини ҳибсга олди, сўнгги маълумотларга кўра, 59 киши ҳалок бўлди, 155 киши жароҳатланди, деб хабар бермоқда BBC.

Ёнғин шанбадан якшанбага ўтар кечаси Кочани шаҳридаги Pulse клубида маҳаллий вақт билан соат 02:30 да содир бўлган. У ерда 500 га яқин одам машҳур маҳаллий ДНК гуруҳининг концертига тўпланган.

Дастлабки маълумотларга кўра, ёнғинга пиротехника воситаларидан фойдаланиш сабаб бўлган.

Шимолий Македония Республикаси прокуратураси матбуот котиби Биляна Арсовсканинг BBCга айтишича, фожиага алоқадор бўлиши мумкин бўлган 10 нафар гумонланувчи, жумладан, клубга лицензия берган амалдорларни ҳибсга олиш учун ордер берилган.

Аввалроқ ОАВ вакиллари клуб хўжайини қўлга олингани ҳақида хабар берган эди.

Прокуратура вакили, шунингдек, клубнинг фақат битта чиқиш йўли борлигини, бинонинг орқа томонидаги эшиги қулфлангани учун фойдаланиш имконсиз бўлганини ҳам айтди.

Шунингдек, ёнғин содир бўлган жойни дастлабки кўздан кечириш чоғида бир қанча ноаниқ ҳолатлар аниқланган.

— Ёнғин ўчириш ва чақмоқлардан ҳимоя қилиш тизимларида камчиликлар мавжуд эди, — деди прокуратура вакили BBCнинг Newshour дастурида.

Арсовска, шунингдек, ўша куни чиқиш қилган ДНК гуруҳининг фақат битта аъзоси тирик қолганини ва у касалхонага ётқизилганини айтди. Гуруҳнинг қолган аъзолари ҳалок бўлди.

Эслатиб ўтамиз, аввалроқ Шимолий Македонияда тунги клубда содир бўлган ёнғинда 51 киши ҳалок бўлгани ҳақида хабар берган эдик.

Давлат раҳбари Шимолий Македония Президентига ҳамдардлик телеграммаси йўллади.