ШҲТнинг халқаро миқёсдаги обрўсига баланд – Қасим-Жомарт Тоқаев

ASTANА. Каzinform – Беларусь Республикасининг Шанхай ҳамкорлик ташкилотига аъзо бўлиш жараёни ниҳоясига етмоқда. Бу ҳақда Давлат раҳбари Қасим-Жомарт Тоқаев ШҲТга аъзо Давлатлар раҳбарлари кенгаши мажлисида маълум қилди, дея хабар беради Kazinform Ақордага таяниб.

«Аввало, Ҳиндистон Республикасининг Шанхай ҳамкорлик ташкилотига муваффақиятли раислиги учун Бош вазир Нарендра Модига миннатдорчилик билдираман. Мамлакатингиз ташкилотимизни изчил ривожлантириш ва халқаро нуфузини оширишга катта ҳисса қўшди. Бугунги саммит очиқлик, ўзаро ишонч ва тенг қонуний ҳуқуқлар тамойилларига асосланган глобал кўп томонлама мулоқотга янги суръат бағишлайди. ШҲТ жадаллик билан кенгайиб бормоқда. Бу ташкилотнинг роли ортиб, кўп томонлама ўзаро манфаатли ҳамкорлигимиз мустаҳкамланиб бораётганини англатади.

Шу билан бирга, Эрон Ислом Республикаси Президенти ҳамкасбимиз Иброҳим Райсийни ШҲТга тўлақонли аъзо давлат мақомини олгани билан табриклашга ижозат бергайсиз. Беларусь Республикасининг Ташкилотимизга қўшилиш жараёни якунланмоқда. Фурсатдан фойдаланиб, ҳамкасбимиз Президент Александр Лукашенкони кеча бўлиб ўтган Беларуснинг Мустақиллик куни билан табриклайман. Қардош беларусь халқига тинчлик ва фаровонлик тилайман. Бир неча кундан кейин Ўзбекистон Республикасида Президент сайлови бўлиб ўтади. Муҳтарам Президент Шавкат Миромонович Мирзиёевга ушбу муҳим тадбирнинг муваффақиятли ўтишини тилайман», — деди Қ.Тоқаев.

Президент таъкидлаганидек, Шанхай ҳамкорлик ташкилоти халқаро миқёсда юксак нуфузга эга.

«Бугун у муваффақиятли ва кўп томонлама ташкилотга айланди. ШҲТ дунё аҳолисининг қарийб ярмини қамраб олган ва кун тартибида кенг кўламли масалаларни кўриб чиқадиган ягона Евроосиё ташкилотидир. Жаҳон ялпи ички маҳсулотининг тўртдан бир қисми, жаҳон савдосининг 15 фоизи давлатларимизга тўғри келади», – деди Давлат раҳбари.