Саудия Арабистони Суриянинг Жаҳон банки олдидаги қарзларини тўлайди

ASTANA. Kazinform - Ар-Риёд 15 миллион доллар тўлайди, бу Дамашққа молиявий ёрдам олиш имконини беради, деб хабар беради Кazinform агентлиги мухбири.

Саудия Арабистони халқаро молиявий ёрдам, хусусан, инқирозни бошидан кечираётган мамлакат давлат секторини қўллаб-қувватлаш ва инфратузилмани тиклаш учун кўп миллион долларлик грантлар олиш имкониятини очиш мақсадида Суриянинг Жаҳон банки олдидаги қарзларини тўламоқчи. Бу ҳақда Reuters ахборот агентлиги учта манбасига таяниб хабар берди.

Гап тахминан 15 миллион доллар миқдоридаги тўлов ҳақида бормоқда – бу Жаҳон банкининг ёрдам дастурларини қайта тиклаш учун зарур бўлган аниқ миқдор.

Агар Ар-Риёднинг режалари амалга ошса, бу Саудия Арабистонининг 2024 йилда собиқ президент Башар Асад ҳокимиятдан ағдарилганидан кейин Сурияга молиявий ёрдам кўрсатганлиги ҳақидаги илк маълум ҳолат бўлади.

Агентлик манбалари, шунингдек, бу Форс кўрфази мамлакатлари Суриянинг янги ҳокимиятларини қўллаб-қувватлаш жараёнига босқичма-босқич қўшилганидан далолат бериши мумкинлигига ишора қилмоқда. Аввалроқ Қатарнинг Сурия давлат хизматчиларининг маошларини молиялаштириш бўйича худди шундай ташаббуси АҚШнинг санкция сиёсати билан боғлиқ ноаниқлик туфайли қолдирилган эди.

Бироқ март ойида Доҳа энергия таъминотини қисман барқарорлаштириш мақсадида Иордания орқали Сурияга газ етказиб бериш режасини эълон қилди. Reuters хабарига кўра, Вашингтон бу ташаббусга норасмий розилик берган.

Айни пайтда, Сурия ахборот агентлиги SANA хабарига кўра, душанба куни Сурия молия вазири Муҳаммад Ёсир Барния Жаҳон банкининг техник делегацияси билан музокаралар ўтказган. Бу Суриянинг янги маъмурияти ва халқаро молия ташкилоти вакиллари ўртасидаги биринчи очиқ учрашувдир.

Томонлар молиявий-иқтисодий ҳамкорликни мустаҳкамлаш истиқболларини, жумладан, шикастланган энергетика инфратузилмасини тиклаш ва давлат секторида иш ҳақи фондини қўллаб-қувватлаш имкониятларини муҳокама қилдилар. Сурия Молия вазирлиги раҳбари халқаро санкциялар ва аввалги иқтисодий сиёсатларнинг мамлакат банк тизимига салбий таъсирини ҳам таъкидлади.

Хабар қилинишича, Сурия делегацияси Дамашқда ҳокимият алмашганидан кейин илк бор Жаҳон банки ва ХВЖнинг баҳорги сессияларида иштирок этиш учун Вашингтонга ташриф буюришга ҳозирлик кўрмоқда. Делегациянинг Америка расмийлари билан учрашиши кутилмайди, бироқ унинг иштироки муҳим воқеа сифатида кўрилмоқда.

Қисман гуманитар ёрдам кўрсатилганига қарамай, Асад ҳукмронлиги даврида Сурияга нисбатан киритилган санкцияларнинг аксарияти ўз кучида. Ўтган ой АҚШ президенти Дональд Трамп маъмурияти Сурия томонига шартлар рўйхатини топширди, уларнинг бажарилиши чекловларнинг қисман юмшатилишига олиб келиши мумкин.

Эслатиб ўтамиз, аввалроқ Жанубий Корея ва Сурия дипломатик муносабатлар ўрнатгани ҳақида хабар берган эдик.