Расми тескари босилган почта маркаси аукционда 2 миллион долларга сотилди

Ўтган ҳафта Нью-Йоркдаги ким ошди савдосида янги рекорд ўрнатилди: “Тўнкарилган Женни” почта маркаси икки миллион долларга сотилди.

Бу жаҳон филателияси бўйича рекорд эмас, энг қиммат марка – British Guiana тўққиз йил аввал 9,5 миллион долларга сотилган эди. Аммо бу АҚШда ишлаб чиқарилган марка учун рекорддир, деб хабар беради Kazinform агентлиги ВВСга таяниб.

“Тўнкарилган Женни” деб номланган машҳур марка 1918 йилда пайдо бўлди. Унинг номинал қиймати 24 цент эди. Ўзига хос жиҳати шундаки, штампда тасвирланган “Женни” деб номланган Curtiss JN-4 почта самолёти ҳатолик билан тескари босилган.

Почта ходимлари хатони дарҳол пайқашган бўлса-да, 100 та марка тарқалиб кетган. Коллекциячи-филателистлар қолган юзта марка учун катта миқдорда пул тўлашга тайёр.

76 ёшли таниқли коллекциячи Чарльз Хэк Robert A Siegel Auction Galleries аукционида марка учун 2 миллион доллар тўлаган.

Хэк аллақачон иккита “Тўнкарилган Женни”га эга. Биринчиси аср бошида 300 минг долларга сотиб олинган бўлса, иккинчиси 2007 йилда бир миллион долларга яқин тўлаб олинган.

Ушбу марка узоқ вақтдан бери филателистларнинг қўлидан йироқ эди. Чиқарилганидан кейин уни ҳеч қачон бегона одамлар кўрмаган, чунки эгаси ва унинг авлодлари уни банк сейфида сақлашган. Шунинг учун унинг нархи юқори эди.

2018 йилда у биринчи марта ким ошди савдосида сотилди.

100 та марканинг ичидаги 49 рақамлиси 105 йилдан бери ёруғлик тушмагани учун яхши сақланган. “Ранги – аниқ, қоғози эса – оқ”, – дейилади сотувга чиқарилган марка тавсифида.

Чарльз Хэк Washington Post газетасига берган интервьюсида қимматбаҳо марка бундан кейин ҳам ёруғликдан ҳимояланишини айтди.