Путин Украинага олдиндан ҳеч қандай шартларсиз музокараларни давом эттиришни таклиф қилди

ASTANА. Кazinform — Музокаралар 15 май куни Истанбулда бўлиб ўтиши мумкин, деди Россия президенти Кремлда қилган чиқишида. Бу ҳақда BBC хабар берди.

Унинг нутқи тахминан 20 дақиқа давом этди ва Москва вақти билан 1:30 да бошланди.

— Музокаралар давомида янги келишувга эриша олишимиз мумкин, — деди Путин ва “тўп ҳозир Украина майдонида” эканлигини қўшиб қўйди.

Путин, шунингдек, Москва Ғарб давлатлари ва Киев таклиф қилган янги ўт очишни тўхтатиш келишувига рози бўлмаслигини очиқ айтди.

Аввалроқ, 10 май, шанба куни АҚШ, Германия, Буюк Британия, Франция, Польша ва Украина етакчилари Москвага 12 майдан бошлаб 30 кунлик ўт очишни тўхтатишни таклиф қилган эди.

Бу таклиф Москва аввалроқ бир томонлама эълон қилган уч кунлик оташкесимнинг давоми бўларди.

Киев Россия президентининг таклифига ҳозирча изоҳ бермади.