Президент Атом энергияси бўйича халқаро агентлик Бош директорини қабул қилди
Қасим-Жомарт Тоқаев Атом энергияси бўйича халқаро агентлик Бош директори Рафаэль Гроссига эҳтиром кўрсатди ва унинг ташрифи Қозоғистон ва агентлик ўртасидаги ҳамкорликни янада мустаҳкамлашда муҳим аҳамият касб этишини таъкидлади.
– Ишонаманки, сизнинг ташрифингиз ўзаро муносабатларимизни ривожлантириш учун ўз вақтида бўлди. Агентлик билан ишлаш Қозоғистон учун жуда муҳим. Сизни жуда муҳим тузилма раҳбари сифатида қўллаб-қувватлаймиз ва юксак қадрлаймиз, - деди Президент.
Учрашувда техник соҳадаги ҳамкорликни мустаҳкамлаш ва мамлакатда АЭС қуришга оид кенг кўламли масалалар муҳокама қилинди.
Президент Агентлик атом энергиясидан тинч мақсадларда фойдаланиш, ядро хавфсизлиги режимини мустаҳкамлаш масалаларида муҳим ўрин тутишини таъкидлади.
Ўз навбатида, Рафаэль Гросси Қасим-Жомарт Тоқаевга кўрсатган шарафи учун миннатдорлик билдирди ҳамда Қозоғистоннинг етакчилардан бири ва ядровий қуролсизланиш ҳамда уни тарқатмаслик жараёнининг масъулиятли тарафдори сифатидаги ролини юқори баҳолади.
– Турли соҳаларда биргаликда кўп ишларни амалга оширдик. Сиз билан соғлиқни сақлаш соҳасидан тортиб, атом энергетикасини ривожлантириш билан боғлиқ бўлажак дастурингизгача бўлган кўплаб масалалар бўйича фикр алмашишдан жуда хурсандман, – деди Атом энергияси бўйича халқаро агентлик Бош директори.
