Пекинда роботларнинг II Жаҳон ўйинларида 666 та жамоа иштирок этади
ASTANA. Kazinform – 22-26 август кунлари Пекинда гуманоид роботларнинг иккинчи жаҳон ўйинлари (World Humanoid Robot Games) бўлиб ўтади, деб хабар беради Синьхуа агентлиги.
Бу йил мусобақа дастурига 51 та спорт ва амалий йўналиш бўйича 1301 та беллашув киритилган. Унда дунёнинг 16 давлатидан 666 та жамоа ва 2056 та робот иштирок этади. Илк ўйинлар билан таққослаганда, жамоалар сони 138 фоизга, роботлар сони эса тўрт бараварга ошган.
Мусобақалар Пекиндаги «Муз тасмаси» миллий коньки учиш стадионида ўтказилади.
Ташкилий қўмита раиси доимий ўринбосари, Пекин шаҳар иқтисодиёт ва ахборот технологиялари бошқармаси директори Цзян Гуанчжининг айтишича, бу йил дастурга узунликка сакраш, оғир атлетика, арқон тортиш, стол тенниси ва бошқа юқори жадалликдаги беллашувлар қўшилган.
“Бу мусобақалар роботларнинг конструкцияси ва уларнинг асосий компонентлари учун катта синов бўлади”, – деди у.
Бундан ташқари, роботлар реал иш шароитларига имкон қадар яқин муҳитда синовдан ўтказилади. Улар саноат, меҳмонхона бизнеси, уй хўжалиги, логистика ва бошқа соҳалардаги вазифаларни бажаради.
Робот қўлларининг чаққонлигини синашга қаратилган алоҳида мусобақалар ҳам кўзда тутилган. Улар орасида деталларни йиғиш ва узатиш, маиший юмушларни бажариш, ёнғин ўчириш-қутқарув операциялари ҳамда китобларни саралаш каби вазифалар бор.
Ташкилотчиларнинг айтишича, мусобақалар давомида ишлаб чиқилган қоидаларнинг салмоқли қисми кейинчалик роботларни техник қабул қилишнинг амалий стандартларига айланиши мумкин. Шу тариқа мусобақалар янги технологияларни синовдан ўтказиш билан бирга, гуманоид роботлар ишлаб чиқариш саноатининг ривожланишига ҳам ҳисса қўшади.
Эслатиб ўтамиз, аввалроқ Қозоғистонлик ўқувчилар Пекиндаги робототехника чемпионатида кумуш медални қўлга киритгани ҳақида хабар берган эдик.
