Овқатдан оммавий заҳарланган саккиз бола Ўш шифохоналарида қолмоқда

ОSH. КABAR – Кazinform – Ўш шаҳрида сифатсиз қандолат маҳсулотларидан оммавий заҳарланган саккиз бола касалхонада қолмоқда. Шаҳар маъмурияти мазкур ҳолат юзасидан суриштирув ишларини олиб бормоқда, дея хабар беради Kazinform Kabarга таяниб.

Ўш шаҳар вице-мэри Венера Рисқулова сифатсиз қандолат маҳсулотларидан заҳарланиб, Ўш шаҳар шифохонасининг Болалар юқумли касалликлар шифохонасига ётқизилган фуқароларнинг аҳволи билан танишди.

В.Рисқулова муассасага ташрифи чоғида иссиқ мавсумда овқатланишни диққат билан кузатиб бориш, яроқлилик муддати ўтган, ёрлиғи бўлмаган ва тасдиқланган тартибда сертификатланмаган маҳсулотларни истеъмол қилмаслик зарурлигини таъкидлади.

Тиббиёт ходимларига ҳам фуқароларнинг саломатлигини назорат қилиш, ҳар томонлама ёрдам кўрсатиш топширилган. Ўш шаҳар ҳокимлиги олиб борилаётган тергов натижаларига кўра амалдаги қонунчилик доирасида барча зарур чораларни кўради.

Умуман олганда, 1-3-май кунлари Ўш шаҳридаги тиббиёт муассасаларига овқатдан заҳарланиш аломатлари билан 40 нафар фуқаро ётқизилган бўлиб, улардан 21 нафари 14 ёшгача бўлган болалар, 19 нафари катталардир. Болалар юқумли касалликлар шифохонасида шу кунгача саккиз нафар бола шифокорлар назоратида.