Осиёдаги энг йирик бюджетли авиакомпания самолётлари Қозоғистонга учади

ASTANA. Kazinform – ҚР Индустрия ва инфратузилмаларни ривожлантириш вазири Қайрбек Ўскенбаев Air Asia Aviation Group компаниясининг тижорат директори Карен Чан хоним билан учрашди, дея хабар беради Kazinform вазирлик матбуот хизматига таяниб.

Учрашув чоғида Қозоғистон ва Малайзия ўртасида мунтазам йўловчи ва юк ҳаво қатнови масалалари муҳокама қилинди.

Air Asia Aviation Group вакилларининг айтишича, биринчи босқичда авиакомпания Куала-Лумпур (Air Asia X) ва Бангкокдан (Thai Air Asia X) Алмати шаҳрига ҳафтасига 4 та рейс ва ҳафтасига 3 та рейсни Астанага йўлга қўйишни режалаштирмоқда.

Шунингдек, Air Asia авиакомпанияси Қозоғистон ҳудудида «виртуал хаб» яратиш ва шу билан бирга Истанбул (Туркия), Париж (Франция), Франкфурт (Германия), Лондон (Буюк Британия) шаҳарларига «ҳаво эркинлиги» нинг бешинчи даражаси билан парвоз қилишни режалаштирмоқда.

Икки давлат ўртасида авиақатновларнинг очилиши савдо-иқтисодий алоқалар, туризм ва ишбилармонлик ҳамкорлигини янада ривожлантиришга хизмат қилиши кутилмоқда.

Эслатиб ўтамиз, Air Asia Осиёдаги энг йирик бюджетли авиакомпания ҳисобланади. 1996 йилда ўз фаолиятини бошлаган авиакомпания 600 миллиондан ортиқ йўловчини ташиди. Бундан ташқари, компания самолётлари дунёнинг 25 мамлакатидаги 400 дан ортиқ йўналишларга парвоз қилади. Самолёт паркида 250 дан ортиқ самолётлар мавжуд.

Ушбу йиғилишда Фуқаро авиацияси қўмитаси раиси Талғат Ластаев, Air Asia Aviation Group компаниясининг даромадлар ва йўналишлар бўйича директори жаноб Пол Кэрролл ва Air Asia X авиакомпания ижрочи директори жаноб Беньямин Исмаил иштирок этди.