Нохомашё тармоқларига жалб қилинган инвестициялар ҳажми ортиб бормоқда – Қозоғистон Бош вазири

ASTANA. Kazinform - 10 ойда Қозоғистонда иқтисодий ўсиш 2,5 фоизни ташкил этди. Бу ҳақда Қозоғистон Республикаси Бош вазири Алихан Смаилов маълум қилди, дея хабар беради Kazinform мухбири.

«Мамлакат иқтисодиёти барқарор ўсиш суръатларини сақлаб қолмоқда. Жорий йилнинг 10 ойи якунлари бўйича иқтисодиётнинг реал ўсиши ўтган йилнинг шу даврига нисбатан 2,5 фоизни ташкил этди. Иқтисодиётни барқарорлаштиришнинг асосий омили сифатида реал сектор ривожланишнинг ижобий тенденциясини кўрсатмоқда. Хусусан, ишлаб чиқариш саноатида ишлаб чиқариш ҳажми 4,3 фоизга ошди»

, — деди Алихан Смаилов бугун Ҳукумат йиғилишида.

Унга кўра, машинасозлик саноати – 7,7, жумладан, автомобилсозлик – 18,3, электротехника ускуналари ишлаб чиқариш – 12,4, кимё саноати – 10,6, енгил саноат – 7,8, қайта ишланган нефт маҳсулотлари ишлаб чиқариш – 3, 7, озиқ-овқат маҳсулотлари ишлаб чиқариш – 3,5 фоизга ўсган. Қурилиш соҳасида 5 фоизлик барқарор ўсиш қайд этилди.

«10 ойда мамлакатимизда 11,7 миллион квадрат метр уй-жой фойдаланишга топширилди. Қишлоқ хўжалигида ўсиш даражаси барқарор – 8 фоиздан ортиқ. Хизмат кўрсатиш соҳаси 1,6 фоизга ўсди. Савдо 4 фоиздан ортиқ, транспорт соҳаси ҳам шунга ўхшаш, яъни деярли 4 фоиз. Алоқа - 7 фоизга ошди. Маҳаллий ва хорижий инвестицияларни жалб қилиш иқтисодий ўсишнинг муҳим омилидир. Асосий капиталга йўналтирилган инвестициялар ўсиши 6,7 фоизни ташкил этади. Улар орасида иқтисодиётнинг нонефт тармоқларига йўналтирилаётган инвестициялар ҳажми ортиб бормоқда. Кўчмас мулк билан боғлиқ операциялар, шунингдек, транспорт ва сақлаш, қишлоқ хўжалиги ва саноат соҳаларида инвестицияларнинг юқори ўсиши кузатилди»

, — деди Ҳукумат раҳбари.

Муаллиф: Марлан Жиембай