Мусулмон умматининг улуғ байрами – Рамазон ҳайити бошланди
ASTANА. Кazinform – Бугун бутун дунё мусулмонлари учун энг муқаддас икки байрамдан бири бўлган Рамазон ҳайити байрамидир. Байрам уч кун давом этади.
“Ҳайит” сўзи — “байрам”, “ҳол-аҳвол сўрашиш”, “бир-бирини хурсанд қилиш”, “ҳурсандчилик учун йиғилиш” деган маъноларни англатади. Яратгувчимиз ҳар бир яхшилик ва эзгуликни мукофотлайди ва Ўз раҳмати ва иноятини ёғдиради.
Ҳайитнинг биринчи кунида Аллоҳ йўлида бир ой рўза тутиб, Исломнинг беш арконидан бири бўлган рўзанинг шартларини бажарганлар оғиз очадилар.
Мусулмонлар Рамазон ойи билан хайрлашиб, Рамазон ойига эсон-омон етказгани учун Аллоҳ таолога шукроналар айтади ва келгуси Рамазон ойига ҳам соғ-саломат етиш учун дуо қилади.
Ҳадиси шарифда айтилганидек, Аллоҳ таоло: “Бандаларим фарз қилган рўзани тутиб, савоб олиш учун (ҳайит намозини ўқиш учун) масжидга йўл олдилар. Улар мен учун рўза тутдилар, менинг амрим билан ифтор қилдилар, энди хурсанд бўлсинлар...” дейди.
Рамазон ҳайити кунларида ҳар бир мусулмон хонадонида қатлама ва бўғирсоқ пиширилади, ҳар бир хонадонда одатдагидан кўра нафис ва ҳашаматли байрам дастурхони ёзилиб, меҳмонлар таклиф қилинади. Бундан ташқари, кам таъминланганларга ёрдам кўрсатилиб, улар байрамдан четда қолмайди. Шу кунларда қариндош-уруғлар бир жойга йиғиладилар ёки қабристонларни зиёрат қилиб, вафот этган яқинлари хотирасига Қуръон тиловат қилишади.
Муборак Рамазон ойидан сўнг келадиган ушбу улуғ айём бутун дунё мусулмонлари томонидан катта қувонч ва иштиёқ билан нишонланади. Чунки Рамазон ойи барака ва ҳамжиҳатлик, тинчлик-хотиржамлик, эзгулик, мағфират, раҳм-шафқат ва саховат ойи бўлса, уч кун давомида нишонланадиган Рамазон ҳайити одамларнинг қалби, руҳиятига шодлик бахш этувчи, покловчи улуғ байрам саналади.
Орадан қанча асрлар ўтган бўлмасин, бу улуғ байрамнинг аҳамияти пасаймаган, аксинча, йил сайин ортиб бормоқда. Бу байрамнинг одатдагидан фарқ қиладиган асосий жиҳати шундаки, у одамларни биродарликка, камтарликка, кечиримлиликка, меҳр-оқибатга чорлайди. Мусулмонлар тавба қилишга, Аллоҳ таоло инсониятга берган неъматларига шукр қилишга даъват этилади.
Эслатиб ўтамиз, Рамазон — 2025: Қозоғистоннинг барча ҳудудлари учун рўза тақвими эълон қилинган эди.
