М.Ауезов театрининг Ўзбекистонга гастрол сафари бошланди
TASHKENT. Kazinform – М.Ауезов номидаги Қозоқ миллий драма театри жамоаси Ўзбекистон пойтахтига гастрол сафари билан келди, деб хабар беради Kazinform агентлигининг Тошкентдаги мухбири Алихан Асқар.
Санъатга чанқоқ, театр сирига киришга шошаётган ўзбек томошабинлари ҳаяжонда. Асанали Ашимов бошчилигидаги санъаткорлар гуруҳи маҳаллий халқ томонидан илиқ кутиб олинди.
“Санъат одамларни бирлаштиради. Қозоғистон ва Ўзбекистон ўртасидаги муносабатлар икки давлат маданияти, адабиёти ва тарихи орқали мустаҳкамланади. Бошқа ишларим ва қарийб 90 ёшимга қарамай, сизни кўргани, саломлашгани атайлаб келяпман. Шу тариқа, 17 йилдан сўнг Тошкентга келдик”, – деди Асанали Ашимов.
Шу кунларда Тошкентдаги мусиқали комедия ва оперетта театри саҳнасида саксонга яқин санъаткор ўз чиқишларини намойиш этмоқда. Биринчи спектакль «Қозы Көрпеш – Баян Сұлу» спектаклидир. Ғабит Мусирепов қаламига мансуб севги достони илк бор 1940 йилда саҳналаштирилган. Ўшандан бери у бутун туркий дунёнинг умумий меросига айланиб, ўзининг маънавий қийматини йўқотмаган.
“Асосий ролларни, яъни Қози ва Баянни Мағжан Турус ва Индира Қулмағамбетова ижро этади. Қодар ролини Ғалим Оспанов ижро этади. Томошабинларга тақдим этиладиган «Қорқыттың көрі» спектаклида эса бош ролни Қозоғистон халқ артисти Дулиға Ақмолда ижро этади”, – деди М.Ауезов номидаги Қозоқ миллий драма театри режиссёри Елик Нурсултан.
Миллий санъат жамоаси Тошкентда уч кун бўлиб, «Қозы Көрпеш – Баян Сұлу» асаридан ташқари «Қорқыттың көрі» ва «Бес бойдаққа бір той» спектаклларини намойиш этади.
Шундан сўнг, гастрол сафари Қорақалпоғистон пойтахти Нўкис шаҳрида давом этади. У ердаги томошабинлар «Қыз Жібек», «Қоштасқым келмейді» ва «Махаббат пен қасірет» драмаларини томоша қилишлари мумкин.
М.Ауезов номидаги Қозоқ миллий драма театри бадиий раҳбари Асанали Ашимовнинг айтишича, бадиий жамоа Қорақалпоғистондан кейин Қирғизистонга гастрол сафари билан боради.
