Мақтааралда сув сатҳи пасая бошлади

NUR-SULTAN. Kazinform – Туркистон вилоятининг Мақтаарал туманида тошқин даражаси сезиларли даражада пасайишни бошлади. Бу ҳақда вилоят ҳокимининг ўринбосари Сакен Қалқаманов онлайн-брифингда маълум қилди, деб хабар беради Kazinform.

«Ҳаммаси бўлиб, 6128 аҳолиси бўлган 5 та аҳоли пункти сув остида қолган. Булар: Женис, Жанатурмис, Фирдавсий, Ўргебас ва Дўстлик овуллари. Айни пайтда ушбу овулларда сув босиш хавфи камаймоқда. Хусусан, 5 май ҳолатига кўра, Женис овулида сув сатҳи 2 смга пасайди. Жанатурмис овулида 3 смга, Ўргебас овулида кираверишда эса 6 смга пасайди. Арай аҳоли пунктида бу кўрсаткич 4 сантиметрга камайди», - дейди Сакен Қалқаманов.

Шунингдек, вилоят ҳокими ўринбосари 6 майдан бошлаб эвакуация марказидаги болалар масофадан ўқишларини айтди. Шу билан бирга, Таълим бўлими Мақтааралга дарсликлар ва қўлланмалар билан тўлдирилган юк машинасини юборди.

Таъкидлаш жоизки, Ўзбекистон Республикаси томонидан Мақтаарал тумани ҳудудидаги сувларнинг тезда оқиб кетиши учун Жетисай тумани Қоғали қишлоғи яқинида «Марказий Бетпакдала коллектори» орқали йўл кўпригини айланиб ўтадиган канал қазилган.