Маҳаллий товарларни илгари суриш учун 5 та трансчегаравий хаб қурилади
ASTANA. Kazinform – Инвесторларни жалб этиш марказларига айланадиган 5 та трансчегаравий хаб қурилади. Бу ҳақда ҚР Савдо ва интеграция вазирлигининг кенгайтирилган ҳайъат йиғилишида Арман Шаққалиев маълум қилди.
“Қозоғистон товарлари экспортини ривожлантириш учун зарур инфратузилма қурилмоқда. 5 та трансчегаравий марказ барпо этилади, улар инвесторларни жалб этиш марказларига айланади ва қўшни давлатлар билан хом ашё эмас экспортини ошириш имконини беради. Ташқи инфратузилмани шакллантириш бўйича кенг кўламли ишлар олиб борилмоқда. Элчихоналар кўмагида Хитойда 2 та ҳамкор кўргазма майдончалари ва Урумчи шаҳрида савдо ваколатхонаси очилди. Дубайда «Qazaq Trade House» савдо уйи иш бошлади”, - деди вазир.
Вазирнинг сўзларига кўра, асосий ҳамкор давлатлар, жумладан, Бирлашган Араб Амирликлари, Афғонистон, Тожикистон, Италия, Ўзбекистон, Россия ва Қирғизистонда 10 та савдо-иқтисодий миссиялар ташкил этилган.
“Экспортни рағбатлантиришда муҳим қадам — ҳудудийлаштириш тамойилига асосланган янги ёндашув жорий этилди. Шунингдек, Урумчи билан товар айирбошлаш 22 фоизга, Сичуань провинциясига экспорт 49 фоизга, Цзянсуга экспорт тўрт баробарга ошган. Қозоғистон компанияларининг энг йирик ва энг оммабоп кўргазмаларда иштироки таъминланади, улар: CIFTIS, CIIE, Digital Expo, Евроосиё ЭКСПО. Қозоғистон товарларини миллий павильонлар орқали jd.com, Doiyin, Alibaba халқаро электрон платформаларида тарғиб қилиш бўйича ишлар олиб борилмоқда”, - деди Арман Шаққалиев.
