ҚР Президенти Шарқий Қозоғистон вилояти ҳокими Нуримбет Сақтағановни қабул қилди
ASTANA. Kazinform – Президентга вилоятни ижтимоий-иқтисодий ривожлантириш, зиммасига юкланган вазифаларнинг ижроси ҳақида маълумот берилди.
Вилоят ҳокими ўтган йил якунлари бўйича саноатнинг асосий тармоқларида инвестиция ва маҳсулот ишлаб чиқариш ҳажми ошганини таъкидлади. Умумий майдони 400 минг квадрат метрдан ортиқ уй-жой фойдаланишга топширилди, 46 та янги ишлаб чиқариш қуввати ишга туширилди.
Қасим-Жомарт Тоқаевга кичик ва ўрта бизнесни қўллаб-қувватлаш, инфратузилмани модернизация қилиш, янги ижтимоий объектларни барпо этиш чора-тадбирлари ҳақида маълумот берилди. Нуримбет Сақтағановнинг айтишича, туризм, рақамлаштириш, транспорт-логистика ва агросаноат комплексини ривожлантиришга алоҳида эътибор қаратилмоқда.
“Қишлоқ соғлиқни сақлаш тизимини модернизация қилиш” миллий лойиҳаси доирасида 18 та объект қурилиб, 6 та тиббиёт муассасаси капитал таъмирланди. “Қулай мактаб” миллий лойиҳаси бўйича 5 та ўқув маркази фойдаланишга топширилди. Ўқувчилар ўринлари танқислигини камайтириш учун 7 та мактаб қурилади.
Давлатимиз раҳбарига “Ишчилар касби йили”да корхоналар талабидан келиб чиқиб, қурилиш, қишлоқ хўжалиги, авиация, энергетика ва сув транспорти соҳаларида янги таълим дастурлари очилиши маълум қилинди. Меҳнаткашларни қўллаб-қувватлаш мақсадида “Отбаси банк” билан ҳамкорликда ҳудудий “Шарқ мутахассиси” соддалаштирилган ипотека дастури йўлга қўйилди.
Вилоят ҳокими вилоят аҳолисини тоза ичимлик суви билан таъминлаш вазифаси йил охиригача бажарилишини таъкидлади. Бу йўналишда умумий қиймати 14 миллиард тенге бўлган 8 та лойиҳа амалга оширилади.
Келгуси икки йилда вилоятга камида 1,5 триллион тенге сармоя киритиш, 700 минг квадрат метрдан ортиқ уй-жой ва 28 та ижтимоий соҳа объектларини қуриш, шунингдек, 600 километрдан ортиқ йўлларни таъмирлаш режалаштирилган.
Президент вилоят иқтисодиётини диверсификация қилиш, қайта ишланган маҳсулотлар экспортини кенгайтириш, сармоя жалб этиш борасидаги ишларни кучайтириш бўйича кўрсатмалар берди. Қасим-Жомарт Тоқаев минтақадаги экологик муаммоларни ҳал этиш ва транспорт инфратузилмасини яхшилаш муҳимлигини таъкидлади.
