ҚР Президенти “Самруқ-Қазна” АЖ бошқаруви раиси Нурлан Жақиповни қабул қилди
ASTANA. Kazinform – Давлат раҳбарига “Самруқ-Қазна” АЖнинг ўтган йилги фаолияти якунлари ҳақида маълумот берилди ва келгуси давр учун режа тақдим этилди. Бу ҳақда Ақорда маълум қилди.
Президентга 2021-2024 йилларда ўртача йиллик даромад 13 фоизни ташкил этгани маълум қилинди.
Нурлан Жақиповнинг сўзларига кўра, компаниялар гуруҳининг инвестиция портфели умумий қиймати 100 миллиард доллардан ортиқ бўлган 130 та лойиҳани ўз ичига олади. Жорий йилда 7 та йирик инвестиция лойиҳасини амалга ошириш режалаштирилган. “Дўстлик-Мўйнти” участкасида иккинчи темир йўл линияси ва Алмати айланма темир йўли қурилиши, Ақтау порти базасида контейнер пунктини ташкил этиш каби лойиҳалар шулар жумласидандир.
Қасим-Жомарт Тоқаевга ўтган йили маҳаллий ишлаб чиқарувчиларни қўллаб-қувватлаш бўйича кўрилган чора-тадбирлар ҳақида маълумот берилди. Тадбиркорлар билан 1,1 триллион тенгелик шартномалар имзоланди. Офтейк-шартномалари сони 2023 йилга нисбатан 10 баравар ошди.
«Давлат раҳбари “Самруқ-Қазна” АЖ активлари самарадорлиги ва қийматини ошириш бўйича ишларни давом эттириш муҳимлигини таъкидлади. Президентимиз таъкидлаганидек, миллий иқтисодиёт келажагига бевосита дахлдор бўлган асосий инфратузилма лойиҳаларини сифатли амалга оширишга алоҳида эътибор қаратиш лозим», – дейилади хабарда.
Эслатиб ўтамиз, аввалроқ Қасим-Жомарт Тоқаев СNNC бош директори Шэнь Яньфэнни қабул қилгани ҳақида ёзган эдик.
