ҚР Президенти “Qarmet” металлургия заводига ташриф буюрди
ASTANA. Kazinform – Қасим-Жомарт Тоқаевнинг Қарағанди вилоятига хизмат сафари Темиртау шаҳридаги “Qarmet” металлургия заводига ташриф билан бошланди.
Президент 3-домна печи фаолияти билан танишди. Бу ерда йилига 3,8 миллион тонна чўян ишлаб чиқарилади.
“Qarmet” акциядорлик жамияти директорлар кенгаши раиси Андрей Лаврентьев ва корхона бош директори Вадим Басин ишлаб чиқаришни ривожлантириш борасида амалга оширилаётган лойиҳалар ҳақида ахборот берди. Бунинг учун 3,5 миллиард доллардан ортиқ маблағ йўналтирилди. Бундан ташқари, кўмир департаментидаги 500 миллион долларга яқин, Темир рудаси департаментидаги 978 миллион долларга яқин лойиҳаларга сармоя киритиш режалаштирилган.
Корхонада бино ва иншоотларда кенг кўламли таъмирлаш ишлари олиб борилмоқда. Бу йилги модернизация дастурига 100 дан ортиқ объект киритилган. 50 минг квадрат метр том алмаштирилмоқда. Шунингдек, “Тозалик” дастурига мувофиқ 120 та санитария-маиший биноларни таъмирлаш ишлари бошланди.
Давлат раҳбарига плита ва блумлар ишлаб чиқарадиган 2-конвертор цехи, металл буюмларни узлуксиз қуйиш дастгоҳи фаолияти билан таништирилди. Корхона раҳбарияти муассасанинг техник ҳолатини сақлаш, таъмирлаш тизимини такомиллаштириш, шунингдек, циркуляция тизимлари ва барча машина сегментларини такомиллаштириш бугунги куннинг асосий вазифаси эканлигини таъкидлади. Келгуси йилда бошқарув ва гидравлика тизимларини модернизация қилиш амалга оширилади.
Андрей Лаврентьевнинг сўзларига кўра, амалга оширилган лойиҳалар завод ишини барқарорлаштириб, компаниянинг “5-9-5” дастурини амалга оширишни олдиндан кўриш имконини берди.
Қабул қилинган стратегияга кўра, корхонада 2028 йилгача 5 миллион тонна пўлат, 9 миллион тонна кўмир ва 5 миллион тонна темир рудаси концентрати ишлаб чиқариш кўзда тутилган. Бу 2023 йилдаги кўрсаткичларга нисбатан ўртача 66 фоизга ўсишни англатади.
Давлат раҳбари заводнинг табиий газга ўтказилиши муҳим қарор эканини таъкидлади. Бу дастлабки босқичда атроф-муҳитга етказилиладиган зарарни 30 фоизга камайтириш имконини беради. Жорий йилнинг кузида Темиртау шаҳрида экологик тоза транспорт тури – трамвай линияси тикланади. Президент саноат хавфсизлигини таъминлаш, ишлаб чиқариш самарадорлигини ошириш ва модернизация қилиш, ҳудуднинг экологик ҳолатини яхшилаш йўналишида амалга оширилаётган лойиҳаларнинг муддатлари ва юқори сифат стандартларига қатъий риоя этиш зарурлигини таъкидлаб, бир қатор аниқ топшириқлар берди.
“Маҳаллий инвесторни таклиф қилиб, тўғри қарор қилдик. Улар дарҳол ишга киришдилар. Заводдаги аҳвол аввалгига нисбатан анча яхшиланди. Лекин бу билан чекланиб қолмаслик керак. Асосий вазифа – “Qarmet” корхонасининг аввалги шон-шуҳратини тиклаш, ижтимоий муаммоларни ҳал этишга алоҳида эътибор қаратиш. Бу йўналишда ишлар бошлаб юборилди. Мен бундан хабардорман. Мен заводга ҳар йили ташриф буюриб, унинг ривожланиши билан яқиндан танишаман”, – деди Қасим-Жомарт Тоқаев.
Айни пайтда “Qarmet” акциядорлик жамиятида 34 мингдан ортиқ ишчи меҳнат қилмоқда. Металлургия заводининг ишлаб чиқариш қуввати йилига 5,3 миллион тонна пўлат ишлаб чиқариш қувватига эга. Ўтган йили корхонада 2,9 миллион тонна тайёр маҳсулот ишлаб чиқарилди. Унинг 2,1 миллион тоннаси Россия, Хитой, Ўзбекистон, Қирғизистон, Тожикистон, Туркманистон, Грузия, Озарбайжон ва Афғонистонга экспорт қилинди.
Эслатиб ўтамиз, бунгача Давлат раҳбари амалий ташриф билан Қарағанди вилоятига келгани ҳақида ёзган эдик.
