ҚР Президенти Миллий қурултойда кўтарилган ташаббусларни амалга ошириш режасини имзолади
ASTANА. Кazinform — 53 банддан иборат мазкур ҳужжат Президент Администрацияси томонидан Ҳукумат билан ҳамкорликда ишлаб чиқилган. Бу ҳақда ҚР Давлат маслаҳатчиси Ерлан Қарин ўзининг Теlegram-каналида ёзган.
— Бугун Давлат раҳбари Миллий қурултойнинг IV йиғилишида кўтарилган ташаббусларни амалга ошириш режасини имзолади. 53 банддан иборат ушбу ҳужжат Президент Администрацияси томонидан Ҳукумат билан ҳамкорликда ишлаб чиқилган. Режада Давлат раҳбарининг гуманитар ва ижтимоий-иқтисодий соҳалардаги топшириқларини амалга ошириш бўйича аниқ чора-тадбирлар белгиланган, – дея таъкидлади Ерлан Қарин.
Давлат раҳбарининг инсонпарварлик ташаббусларини амалга ошириш учун:
● "Қозоғистон болалари" ягона дастурини ишлаб чиқиш;
● Ички сиёсат концепциясини ишлаб чиқиш ва тасдиқлаш;
● 2026-2028 йилларга мўлжалланган гиёҳвандлик ва гиёҳвандлик воситаларининг ноқонуний айланишига қарши курашиш бўйича янги комплекс режани қабул қилиш;
● Миллий рақамли архивни яратиш;
● Ҳудудларда бизнес вакилларини жалб этган ҳолда театрлар қуриш ва ривожлантириш, шунингдек, миллий театрларни қўллаб-қувватлаш;
● Хорижда Абай институтини очиш;
● Биологик хилма-хилликни муҳофаза қилиш халқаро жамғармасини ташкил этиш кўзда тутилмоқда.
Ижтимоий-иқтисодий лойиҳалар қаторида қуйидагиларни қайд этиш мумкин:
● “Қулай мактаб” миллий лойиҳасини амалга оширишни давом эттириш, уч йил ичида 1300 та мактабни модернизация қилиш;
● Алоҳида эҳтиёжли шахслар учун замонавий реабилитация марказларини очиш, ҳар бир вилоят марказида алоҳида эҳтиёжли болалар учун реабилитация ва ривожланиш марказларини ташкил этиш;
● Ҳудудий ривожланиш концепциясига янгича ёндашувларни жорий этиш;
● 2025-2026 йилларда йирик инфратузилма лойиҳаларини амалга ошириш, жумладан, Астанадан Арқалиқ, Торғай ва Ирғиз орқали тўғридан-тўғри Транскаспий халқаро транспорт йўлагига олиб борувчи автомобиль йўлини қуриш ва модернизация қилиш, Арқалиқ шаҳридаги аэропортни реконструкция қилиш ва янги аэропорт терминал мажмуасини қуриш;
● Келгуси тўрт йил давомида мамлакатда ҳар йили 200 га яқин инвестиция лойиҳасини ишга тушириш.
— Бундан ташқари, чегара ҳудудларини ривожлантириш, илм-фан шаҳарчаларини барпо этиш, алоҳида эҳтиёжли болаларни ҳар томонлама қўллаб-қувватлаш, нодавлат нотижорат ташкилотлари, давлат ижтимоий буюртмалари бўйича алоҳида қонунлар қабул қилинади. Умуман олганда, Давлат раҳбарининг Миллий қурултойнинг IV йиғилишидаги ташаббус ва топшириқлари ҳам давлат органлари, ҳам бутун жамият учун мамлакатнинг узоқ муддатли ривожланиш йўналишларини белгилаб беради, — дея хулоса қилди Давлат маслаҳатчиси.
Эслатиб ўтамиз, 14 март куни Бурабайда Миллий қурултойнинг IV йиғилиши бўлиб ўтди.
