ҚР Миллий банки базавий ставкани ошириш сабабини тушунтирди

NUR-SULTAN. Kazinform - Қозоғистонда 2022 йилнинг 1 чорагида истеъмол, инвестиция талаби ва иқтисодиётни кредитлаш ҳажми ошди. Бу ҳақда Қозоғистон Миллий банки раиси Ғалимжан Пирматов маълум қилди, дея хабар беради Kazinform мухбири.

«26 апрелдан бошлаб Миллий банк базавий ставкани +/- 1 фоиз пункти фоиз коридори билан 14 фоизгача оширишга қарор қилди. Бундай қарор иқтисодиётдаги инфляцияни қўллаб-қувватловчи омилларнинг сезиларли даражада ўсиши муносабати билан қабул қилинди. Жорий йилнинг 1-чорагида ишбилармонлик фаоллиги, истеъмол ва инвестиция талаби ҳамда иқтисодиётни кредитлаш ҳажми ошганини кўрдик. Бу омиллар фискал рағбатлантириш чоралари билан бир қаторда ички талабни ҳам қўллаб-қувватламоқда», - деди Ғалимжан Пирматов Миллий банкда ўтказилган матбуот анжуманида.

Раиснинг сўзларига кўра, Миллий банкнинг асосий вазифаси нарх барқарорлигини сақлашдан иборат.

«Шу нуқтаи назардан, ҳозирда истеъмолчи жамғармаларини қўллаб-қувватлашда инфляцияга қарши пул-кредит сиёсатининг ўрни муҳим. Ушбу чора-тадбирлар ёрдамида биз талаб ва таклиф мувозанатини сақлашга, икки хонали рақамга етган тартибсиз инфляциянинг олдини олишга ёрдам бера оламиз. Шунинг учун биз учун базавий ставкани ошириш қарори, биринчи навбатда, инфляция ўсишининг олдини олиш учун зарур чорадир», — деди у.

Эслатиб ўтамиз, аввалроқ Миллий банк базавий ставкани йиллик 14 фоиз қилиб белгилашга қарор қилган эди.

Муаллиф: Али Ибраев