ҚР Энергетика вазири 180 кун ўтгач, суюлтирилган газ нархини қандай тартибга солишини айтди

NUR-SULTAN. Кazinform - Энергетика вазирлиги суюлтирилган газнинг ички бозордаги максимал нархини давлат томонидан белгиланган 180 кунлик муддат тугаганидан кейин тасдиқлаши мумкин. Вазирлик шундай қонун лойиҳасини Мажилисга киритиш ниятида, деб хабар беради Kazinform мухбири.

Бу ҳақда Қозоғистон Энергетика вазири Болат Ақшолақов Мажилисдаги Ҳукумат соатида маълум қилди.

«2022 йил январ ойида Рақобатни ҳимоя қилиш ва ривожлантириш агентлиги суюлтирилган газ нархини тартибга солиш учун 180 кун муддат белгилаган эди. Шу 180 кундан сўнг Энергетика вазирлиги Давлат даромадлари қўмитаси билан биргаликда нархларнинг кескин ошишига йўл қўймаслик учун ички бозорда сотилаётган суюлтирилган газ айланмасини назорат қилади», — деди у газни ўзлаштириш бўйича ҳисоботида.

Унга кўра, Энергетика вазирлигига 180 кундан кейин суюлтирилган газ нархини тартибга солиш бўйича қўшимча ваколатлар берилиши керак.

Вазирлик «Газ ва газ таъминоти тўғрисида»ги қонунга ўзгартишлар пакетини ҳам ишлаб чиқди. Ушбу ўзгартиришга кўра, Энергетика вазирлигига суюлтирилган газнинг чакана савдосининг энг юқори нархини белгилаш ваколатини бериш масаласи кўриб чиқилади. Тегишли тузатишлар ишлаб чиқилгач, улар Қозоғистон Парламенти Мажилисига юборилади», — деди Болат Ақшолақов.

Эслатиб ўтамиз, Қозоғистон Ҳукумати 6 январ куни мамлакатнинг барча ҳудудларида газнинг максимал нархини тасдиқлаган эди. Максимал нарх 180 кунга белгиланди.

Муаллиф: Марлан Жиембай