ҚР Бош вазири Алматидаги Gate Sity сунъий йўлдош шаҳрига ташриф буюрди
Ҳукумат раҳбарига узунлиги 66 километр бўлган Катта Алмати ҳалқа йўли қурилиши лойиҳасининг амалга оширилиши ҳақида маълумот берилди. Бугунги кунда асосий тупроқ ишлари олиб борилди, барча кўприклар, йўллар қурилди. Шу билан бирга, автомобил йўлини ободонлаштириш ва тўловни ундириш, автотранспорт воситаларини динамик ўлчашнинг интеллектуал тизимини жорий этиш бўйича ишлар изчил давом эттирилмоқда.
Бош вазир мазкур автомагистрал ҳудуднинг иқтисодий ривожланишига, сармоявий ва сайёҳлик салоҳиятини оширишга сезиларли таъсир кўрсатишини таъкидлади. Катта Алмати ҳалқа йўли Хитой ва Европа ўртасидаги транзит транспорти ҳажмини ошириш, Алматида транспорт ҳаракатини осонлаштириш имконини беради, яъни шаҳар экологиясига ижобий таъсир кўрсатади.
Шунингдек, Бош вазир ҳамкор шаҳар Gate Sityнинг «Қоянқус» массивида умумий майдони 290 минг квадрат метрдан ортиқ бўлган 70 та кўп қаватли уй қурилиши билан танишди. Ишларни 2024 йил охиригача якунлаш режалаштирилган.
Бундан ташқари, Ҳукумат раҳбари Қонаев шаҳрида 2020 йилда газга ўтказилган «Иссиқлик маркази» иссиқлик таъминоти ташкилоти фаолияти билан танишди. Айни пайтда қарийб 179,72 Гкал/соат ишлаб чиқарилиб, 30 мингга яқин абонент, бюджет ташкилотлари ва бошқа объектларни иссиқлик энергияси билан таъминламоқда.
Алихан Смаилов иссиқлик таъминоти манбаларини газга алмаштириш унинг энергия самарадорлигини ошириш ва атмосферага чиқадиган зарарли моддалар чиқиндиларини сезиларли даражада камайтириш имконини берганини таъкидлади.
Бош вазир «Кнауф Гипс Қапшағай» МЧЖга ташриф буюрди. Корхона 2003 йилда хусусий сармоя ҳисобидан қурилган бўлиб, гипс маҳсулотлари, қуруқ қурилиш аралашмалари, шунингдек, рухланган профиллар ишлаб чиқаради.
Фото: primeminister.kz
