Қозоғистоннинг коронавирусга қарши вакцинасини клиник шароитда синаш бошланди
ҚР Таълим ва фан вазирлиги Илмий қўмитаси Биологик хавфсизлик илмий-тадқиқот институтида ишлаб чиқарилган коронавирусга қарши QazCovid-in вакцинасини клиник синаш ишларига киришди.
«Вакцина клиник синовлари 18 ёшдан 50 ёшгача бўлган соғлом кўнгиллилар ўртасида ўтказилмоқда. Вакцинанинг хавфсизлигини аниқлашга қаратилган тадқиқотнинг I босқичида коронавирус билан касалланмаган ва антитаналари бўлмаган 44 нафар кўнгилли иштирок этди. Иммуногенликни ўрганишнинг иккинчи босқичида 200 нафар кўнгилли қатнашиши режалаштирилган», - дейилади баёнотда.
Биологик хавфсизлик илмий-тадқиқот институтига клиник синовларда иштирок этишни истаган кўнгиллилар томонидан 688та мурожаат келиб тушди. ҚР Таълим ва фан вице-вазири Мирас Дауленов иштирокчиларга миннатдорчилик билдирди.
Клиник тадқиқотлар Қозоғистон Республикаси Соғлиқни сақлаш вазирлигининг «Миллий фтизиатрия ва пулмонология илмий-тадқиқот маркази» ва «Сentre for Clinical Medicine and Research» МЧЖда ўтказилади.
