Қозоғистондан Грузия ва Хитойга янги рейслар йўлга қўйилади
ASTANA. Kazinform - Парвозлар «Air Astana» ва «SCAT» авиакомпаниялари томонидан амалга оширилади, дея хабар беради Kazinform ҚР Транспорт вазирлигига таяниб.
Қозоғистон авиакомпаниялари Грузия ва Хитойга янги рейсларни йўлга қўймоқда.
Жорий йил 27 майдан «Air Astana» Атираудан Тбилисига тўғридан-тўғри рейсларни йўлга қўйишни режалаштирмоқда. Парвозлар ҳафтасига 3 марта сешанба, жума ва якшанба кунлари Airbus типидаги самолётларда амалга оширилади. Ҳозирда Тбилисига парвозлар Алмати ва Ақтау шаҳарларидан амалга оширилмоқда.
2025 йил 28 май ойидан бошлаб «SCAT» авиакомпанияси Чимкент шаҳридан Сиань шаҳрига тўғридан-тўғри рейсларни йўлга қўйишни режалаштирмоқда. Парвозлар чоршанба ва шанба кунлари амалга оширилади. Бугунги кунда Сианга тўғридан-тўғри рейслар Хитой авиакомпаниялари томонидан Алмати ва Астанадан амалга оширилмоқда.
“Янги йўналишларнинг очилиши мамлакатлар ўртасидаги савдо-иқтисодий, сармоявий, туризм ва маданий ҳамкорликни янада ривожлантиришга хизмат қилади”, - дея таъкидлади ҚР Транспорт вазирлиги.
Аввалроқ 2025 йил июнь ойида “Алмати – Пекин” қўшимча рейслари ҳамда “Алмати – Чэнду” янги йўналиши очилиши хабар қилинган эди.
