Қозоғистонда ўртача умр кўриш давомийлиги маълум бўлди

ALMATY. Kazinform – 2023 йилда аҳолининг ўртача умр кўриш давомийлиги 75,09 ёшни ташкил этди ва шу тариқа сўнгги 25 йилдаги энг юқори кўрсаткичга айланди. Эслатиб ўтамиз, 2020-2021 йиллардаги пандемия даврида бу кўрсаткич узоқ давом этган ўсишдан кейин пасайиб, кейин яна тикланди, дея хабар беради Kazinform ҚР Миллий статистика бюросига таяниб.

Статистик маълумотларга кўра, шаҳарларда ўртача умр кўриш қишлоқ жойларига қараганда юқори - мос равишда 75,73 ва 74,02 ёш.

Гендер нуқтаи назаридан аёлларнинг ўртача умр кўриш давомийлиги ҳам ўсди ва 79,06 ёшни (2022 йил – 78,4), эркаклар ўртасида бу кўрсаткич 70,99 ёшни (2022 йил – 70,2 ёш) ташкил этди.

Алматида туғилишда ўртача умр кўришнинг энг юқори кўрсаткичи 78,28 ёшни, энг пасти эса Улитау вилоятида 72,41 ёшни ташкил этади.