Қозоғистонда Буюк Британия университетининг филиали очилади

ASTANA. Kazinform – Бугун ҚР Фан ва олий таълим вазири Саясат Нурбек дунёнинг етакчи тадқиқот университетларидан бири Heriot-Watt раҳбарлари билан учрашди. Учрашув доирасида Буюк Британия олий таълим муассасасининг Қ.Жубанов номидаги Ақтўбе ҳудудий университети билан ҳамкорлиги муҳокама қилинди, деб хабар беради Kazinform.

Ташаббус Давлат раҳбари Қасим-Жомарт Тоқаевнинг олий таълим тизимини иқтисодиёт талабларидан келиб чиққан ҳолда ислоҳ қилиш, шу жумладан, етакчи хорижий олий таълим муассасаларининг филиалларини очиш орқали амалга ошириш бўйича топшириғи доирасида амалга оширилади.

Шартномага кўра, Heriot-Watt университети Жубанов университети негизида учта бакалавриат таълим дастури («Нефт ва газ бизнеси», «Электр энергетикаси», «Компьютер муҳандислиги») шунингдек, «Саноат менеджменти» мутахассислиги бўйича магистратура йўналишини очади. Бу мутахассисликлар вилоят талабидан келиб чиқиб танланади.

«Олий таълим муассасалари ўртасидаги ҳамкорлик маҳаллий техник ва IT-мутахассисларни биргаликда тайёрлашга қаратилган. Битирувчиларга Heriot-Watt университети ва Жубанов университетининг икки томонлама дипломи берилади. Бу йўналишлар Буюк Британия стандартлари асосида ўқитилади ва Heriot-Watt университети томонидан назорат қилинади. Келгуси ўқув йилида абитуриентларни қабул қилиш бошланади», - деди Саясат Нурбек.

Буюк Британия университети вакили Жубанов университети билан ҳамкорликни ривожлантириш борасидаги режалари билан ўртоқлашди. Икки олий таълим муассасалари ўртасида академик мобиллик дастурлари фаол ривожлантирилади.

Heriot-Watt университети - 1821 йилда асос солинган дунёдаги етакчи тадқиқот университетларидан биридир. Математика, кимё муҳандислиги, қурилиш, электротехника ва нефт-газ соҳалари бўйича QS рейтингида дунёдаги энг яхши 300 та университет қаторига киради.