Қозоғистонда бўлиб ўтадиган Кўчманчилар ўйинларида дунёнинг 100 та давлатидан спортчилар иштирок этади

ASTANA. Kazinform – ҚР Парламенти Мажилиси раиси Ерлан Қошанов Астанада V Бутунжаҳон кўчманчилар ўйинлари бошланишига неча кун қолганини кўрсатувчи ортга ҳисоблаш тахтасининг тантанали ишга туширилишида иштирок этди. Бугундан бошлаб санайдиган бўлсак, Қозоғистонда бўлиб ўтадиган Кўчманчилар ўйинларига 170 кун қолди.

Йиғилишда Жаҳон Этноспорт Конфедерацияси президенти Билал Эрдоған, ҚР Туризм ва спорт вазири Ермек Маржикбаев, Астана шаҳар ҳокими Женис Қасимбек, Миллий спорт турлари ассоциацияси президенти Исламбек Салжанов иштирок этди.

Маросимни очиб, Мажилис раиси йиғилганларни улуғ айём – Наврўз байрами билан табриклаб, Жаҳон кўчманчилар ўйинлари нафақат туркий тилли халқлар, балки бутун дунё эътиборини ўзига тортган байроқдор мусобақа эканлигини таъкидлади.

Шунингдек, Ерлан Қошанов бугунги кунда мамлакатда жаҳон мусобақасига қизғин тайёргарлик кўрилаётганини айтди.

“Ушбу қизиқарли мусобақани Қозоғистонда ўтказиш барчамиз учун катта шараф ва масъулиятдир. Давлат раҳбари ушбу мусобақани юқори савияда ташкил этиш бўйича кўрсатмалар берди. Катта ишонч билан айта оламанки, “Кўчманчилар” ўйинини муносиб савияда ўтказамиз. Мазкур танлов қардош туркий халқлар ўртасидаги ўзаро ҳамкорлик ва маданий алоқаларни янада юксалтиришга янги суръат бағишлайди. Бу мамлакатларимиз ўртасидаги маънавий алоқаларни янада мустаҳкамлашига ишонаман”, – деди Мажилис раиси.

Қозоғистонда бўлиб ўтадиган Кўчманчилар ўйинларида дунёнинг 100 та давлатидан вакиллар иштирок этиши кутилмоқда. 60 та давлат ўртасида келишув мавжуд. Унда 20 га яқин спорт тури бўйича тўрт минг нафарга яқин иштирокчи ўзаро куч синашади. Фестивал бир ҳафта давом этади.