Қозоғистон янги сиёсий маданиятни жорий этишнинг янги моделига ўтади - Қозоғистон Президенти
Бу ҳақда Қозоғистон Президенти Қасим-Жомарт Тоқаев Конституцияга ўзгартириш ва қўшимчалар киритиш бўйича кенгаш йиғилишида маълум қилди, деб хабар беради Kazinform.
«Аслида, бу Қозоғистон ҳокимият институтларини шакллантириш ва интеграциялашуви, янги сиёсий маданиятни жорий этишнинг мутлақо янги моделига ўтганини англатади. Аниқ ва тўлиқ тушунчага эга бўлиш учун мен ушбу модел ва жараённи Иккинчи Республика деб белгиладим. Янги парадигмага кўра, Президентнинг ваколатлари қисқартирилади, Парламент ва маслихатларнинг роли сезиларли даражада кучайтирилади. Фуқаролар иштироки сезиларли даражада ошади, ҳуқуқни муҳофаза қилиш тизими мунтазам равишда мустаҳкамланади», - деди Қасим-Жомарт Тоқаев.
Президент Мурожаатномада белгиланган сиёсий ташаббусларни амалга ошириш учун Конституцияга ўзгартиришлар киритиш зарурлигини ҳам таъкидлади.
«Ишчи гуруҳ зарур тузатишларни ишлаб чиқди. Ишда таниқли ҳуқуқшунос олимлар, Инсон ҳуқуқлари бўйича вакил, Парламент ва давлат идоралари вакиллари иштирок этди. Конституциявий судда, Конституциявий кенгашда ишлаган олимларимиз бор. Кўриниб турибдики, уларнинг катта тажрибаси Конституциянинг янги қоидаларини ишлаб чиқишга хизмат қилган. Хусусан, Конституциявий судни ташкил этиш, унинг фаолиятини тартибга солиш борасидаги фикрлар фойдали бўлди, – деди Давлат раҳбари.
Йиғилишда Сенат Раиси Маулен Ашимбаев, Мажилис Раиси Ерлан Қошанов, Давлат котиби Ерлан Карин, Президент Администрацияси раҳбари Мурат Нуртилеу, Адлия вазири Қанат Мусин ва Ишчи гуруҳ аъзолари иштирок этди.
