Қозоғистон ва Туркманистон халқаро йўналишдаги ҳайдовчилар учун виза режимини бекор қилади
ASTANА. Кazinform — Қозоғистон ва Туркманистон ўртасида “рухсатномасиз” юк ташиш тизими жорий этилади. Бу ҳақда ҚР Бош вазири Олжас Бектеновнинг Парламент депутатлари саволига берган жавобида айтилди.
“2024 йилнинг 8 ойи якунига кўра, Транскаспий халқаро транспорт йўналиши (кейинги ўринларда – ТХТЙ ёки Ўрта йўлак) орқали юк ташиш 2,9 миллион тоннани ташкил этди ва бу ўтган йилга нисбатан 69 фоизга ошган (1,75 миллион тонна). 2022 йил 25 ноябрь куни Ақтау шаҳрида Қозоғистон, Озарбайжон, Грузия ва Туркия ўртасида Ўрта йўлакни 2027 йилгача ривожлантириш бўйича йўл харитаси имзоланди. Унинг амалга оширилиши коридорнинг юк ташиш қувватини йилига 10 миллион тоннагача ошириш имконини беради. Жорий йилнинг 10 октябрь куни Қозоғистон ва Туркманистон ўртасида транспорт, логистика ва транзит соҳасида стратегик ҳамкорлик тўғрисидаги битим имзоланган эди. Унда “рухсатномасиз” юк ташиш тизимини жорий этиш, шунингдек, халқаро йўналишларда икки давлат ҳайдовчилари учун виза режимини бекор қилиш имконияти кўзда тутилган. Бу ушбу йўналишда юк ташиш ҳажмини оширишга рағбатлантиради ва ёрдам беради”, - деди Ҳукумат раҳбари ўз жавобида.
Шунингдек, Бош вазир “Ақтау денгиз савдо порти” АЖ ва “Туркманистон савдо денгиз флоти” АЖ ўртасида “ТХТЙ” йўналиши бўйича денгизда юк ташиш имкониятларини кенгайтирувчи ҳамкорлик меморандуми имзоланганини таъкидлади.
“Ҳозирги вақтда Қозоғистон қишлоқ хўжалиги маҳсулотлари Қозоғистон-Туркманистон-Эрон (Инчебурун), Қозоғистон-Ўзбекистон-Туркманистон-Эрон (Серахс) темир йўл йўналишлари бўйича Эронга ҳамда Эрон ҳудуди (Бендер Аббос порти) орқали Форс кўрфази мамлакатларига ташилади. Бундан ташқари, Қозоғистон юклари Ақтау ва Қуриқ портлари орқали Эроннинг Амиробод ва Анзали портларига етказилади. Юк жўнатувчиларнинг сўровларига кўра, ғалла маҳсулотларини алмаштириб юклаш бўйича портларнинг жорий қуввати йил охиригача ҳажмлар билан таъминланган", - деди у.
Эслатиб ўтамиз, аввалроқ Туркманистондан Қозоғистонга газ етказиб бериш масаласи кўриб чиқилаётгани хабар қилинганди.
