Қозоғистон ва Люксембург Ташқи ишлар вазирлари виза масаласини муҳокама қилди

ASTANА. Кazinform – ҚР Бош вазири ўринбосари – Ташқи ишлар вазири Мурат Нуртилеу ва Люксембург Буюк Герцоглиги Ташқи ва Европа ишлари вазири Жан Ассельборн икки давлат фуқаролари учун виза тартибини соддалаштириш масаласини муҳокама қилди, дея хабар беради Kazinform мухбири.

«Биз икки давлат ўртасидаги маданий-гуманитар алоқалар соҳасини кенгайтириш истиқболлари муҳим, деб ҳисоблаймиз. Шу муносабат билан бугун икки давлат фуқароларининг эркин мулоқот қилиши учун шароит яратиш мақсадида ҳурматли меҳмонимиз билан виза масаласини муҳокама қилдик. Люксембург фуқаролари бошқа европаликлар қатори Қозоғистонга туристик ёки бизнес визасисиз келишлари мумкин. Бу ерда биз адолатли бўлишимиз керак. Шенген келишуви Люксембург ҳудудида имзоланганлигини ҳисобга олиб, мен жаноб Ассельборндан Қозоғистон фуқаролари учун визани либераллаштириш масаласида Европа Иттифоқи билан расмий маслаҳатлашувни қўллаб-қувватлашни сўрадим. Умуман олганда, Люксембург Европа институтлари билан мулоқотимиздаги «қўллаб-қувватловчиларимиздан» бири бўлиб қолади, деб ҳисоблаймиз. Бундан ташқари, бундай тузилмаларнинг бир қисми Люксембургнинг ўзида жойлашган», — деди вазир музокаралар якуни бўйича брифингда.

Шу билан бирга, Мурат Нуртилеу жаноб Ассельборнга Қозоғистоннинг сиёсий мулоқот, савдо-иқтисодий ва маданий-гуманитар ҳамкорликни кенгайтириш ниятини қўллаб-қувватлагани учун миннатдорчилик билдирди ва буни икки давлат учун умумий мақсад сифатида тасдиқлади.

«Мен вазир Ассельборн билан яқиндан ҳамкорлик қилишга тайёр эканлигимни тасдиқлайман ва икки томонлама муносабатларни янги босқичга кўтариш учун биргаликда саъй-ҳаракатларни амалга оширишимизга ишонаман», — деди у.

Муаллиф: Марлан Жиембай