Қозоғистон Қирғизистон билан 17,5 миллион долларлик экспорт шартномалари имзолади

NUR-SULTAN. Kazinform – Қозоғистоннинг Бишкекдаги савдо-иқтисодий миссияси ўз ишини якунлади, дея хабар беради Kazinform ҚР Савдо вазирлигига таяниб.

Унда озиқ-овқат саноати, металлургия, логистика, машинасозлик, фармацевтика, кимё саноати каби соҳаларда фаолият юритувчи 20 та маҳаллий компания – товар ва хизматлар ишлаб чиқарувчи корхоналар иштирок этди.

Қозоғистон-Қирғизистон бизнес-форумида Қирғизистоннинг 100 дан ортиқ импортёр ва ишлаб чиқарувчилар компаниялари иштирок этди.

Қозоғистон Қирғизистоннинг учта асосий савдо-иқтисодий ҳамкорларидан биридир. Мамлакатлар ўртасидаги товар айирбошлаш ҳажми 2021 йилда 970,8 миллион долларни ташкил этди, бу 2020 йилга (848,6 миллион доллар) нисбатан 14,4 фоизга кўпдир.

Қозоғистондан Қирғизистонга экспорт 2021 йилда 7,6 фоизга ошиб, 625,2 миллион долларни ташкил қилди.

Қирғизистонга экспорт ҳажмининг ўсиши олтин, минерал ва газланган сув, кўмир, дори-дармон ва автомобиллар каби товарлар етказиб бериш ҳажмининг ошиши билан асосланади. Шунингдек, асосий экспорт товарлари қаторига табиий газ, металл прокати, тамаки маҳсулотлари, цемент, қурилиш материаллари киради.

Қирғизистонга Қозоғистондан қайта ишланган маҳсулотлар экспортини ошириш салоҳияти 100 миллион доллардан ошади, булар асосан озиқ-овқат, кимё, машинасозлик, фарматсевтика, металлургия каби тармоқлардан иборат.

«Қозоғистонда Қирғизистон капитали иштирокидаги 247 қўшма корхона рўйхатга олинган. Корхоналар асосан улгуржи ва чакана савдо, қурилиш, автомобил савдоси, қишлоқ хўжалиги, енгил саноат билан шуғулланади. Қирғизистонда Қозоғистон капитали иштирокида молиявий фаолият, озиқ-овқат ишлаб чиқариш, савдо, автомобил таъмирлаш, транспорт ва алоқа, қурилиш каби йўналишларда 334 та қўшма корхона рўйхатга олинган. Қозоғистоннинг Қирғизистонга киритган тўғридан-тўғри сармоялари ҳажми 1 миллиард доллардан ошди», — деди Қозоғистон савдо ва интеграция вазири ўринбосари Қайрат Тўребаев.

Қозоғистон ва Қирғизистон тадбиркорлари ўртасида олиб борилган музокаралар натижаси сифатида Қозоғистондан Қирғизистон Республикасига туз, ун ва макарон, пиво ва алкоголсиз ичимликлар, қандолат ва сут маҳсулотларини етказиб бериш бўйича 6 та экспорт шартномалари тузилди. Уларнинг умумий қиймати 17,5 миллион долларни ташкил этди.

Қозоғистон бизнеси бундан кейин ҳам потенциал қирғиз ҳамкорлари билан савдо музокараларини давом эттиради.