Қозоғистон қимматли қоғозлар бозоридаги вазият барқарор

NUR-SULTAN. Kazinform – Ташқи бозорларда давом этаётган геосиёсий кескинликларга қарамай, Қозоғистон қимматли қоғозлар бозоридаги вазият барқарорлигича қолмоқда. Бу ҳақда Молия бозорини тартибга солиш ва ривожлантириш агентлиги маълум қилди, деб хабар беради Kazinform.

2022 йил 1 апрел ҳолатига кўра, қимматли қоғозлар бозорининг барча профессионал иштирокчилари капиталнинг етарлилиги ва ликвидлигининг зарур даражасини сақлаб турибди.

2022 йил 1 апрел ҳолатига кўра, KASE савдо рўйхатига 147 та эмитентнинг 161 та акцияси ва 82 та эмитентнинг 324 та облигацияси киритилган.

Март ойи якунлари бўйича KASE индекси 0,4 фоизга пасайиб, 3 348,63 пунктни ташкил этди, энг кўп пасайиш «Қозоғистон Халқ жамғарма банки» АЖда кузатилди (-5,7 фоиз).

Жорий йилнинг март ойида фонд бозори капиталлашуви листинг компаниялари аксиялари қийматининг ошиши ҳисобига 0,8 фоизга ёки 188 миллиард тенгега ўсди ва 2022 йил 1 апрел ҳолатига кўра 23,3 триллион тенгени ташкил қилди.

Биржа савдолари ҳажми иккиламчи бозордаги савдоларнинг ўсиши ҳисобига 2022 йил февралдаги биржа савдолари ҳажмига нисбатан 28,7 фоизга ўсди ва жорий йилнинг март ойида 13,3 миллиард тенгени ташкил қилди.

Қимматли қоғозлар бозоридаги инвесторларнинг асосий тоифалари орасида акциядорлик битимлари умумий ҳажмида жисмоний шахслар улуши 43,7%, брокер ва дилерлар улуши 22,0%, бошқа институционал инвесторлар улуши 19,0%, бошқа юридик шахслар - 15,2% , банклар улуши - 0,1%.