Қозоғистон ҳудудларида олтин нархи қанча
ASTANА. Кazinform - Қозоғистонликлар орасида, жумладан байрам кунларида ҳам тилла тақинчоқларга талаб юқори бўлади. Каzinform мухбири ҳозир бир грамм олтин қанча туришини аниқлади.
Қимматбаҳо металларнинг нархи ҳар йили ошиб бормоқда. Миллий статистика бюроси маълумотларига кўра, 2024 йилда олтин заргарлик буюмлари нархи 8,3 фоизга ошган. Жаҳон бозорида ҳам қимматбаҳо металлар нархи кўтарилди.
Ҳозирда Қозоғистон ҳудудларида бир грамм учун нарх 20 000 тенгедан 80 000 тенгегача. Бу сафар биз 585 ва 583 пробаларининг қийматини билиб олдик.
Мамлакатдаги энг қиммати Атирауда бўлган. У ерда 585 пробалик олтиннинг грамми 80 000 тенгегача туради. Энг арзони эса Чимкентда бўлиб чиқди. У ерда тилла тақинчоқларнинг грамми 20-25 минг тенге туради.
Қарағанди, Орал, Кўкшетау, Қизилўрда ва Таразда бир грамм 585 пробалик олтиннинг нархи 30 минг тенгедан бошланиб, 50 минг тенгега етади.
Нархлар Алмати, Жезқазған, Ақтау, Ақтўбе, Павлодар, Петропавл, Қостанай, Ўскемен, Талдиқорған, Қонаев ва Туркистонда бироз юқорироқ. Олтиннинг бир грамми 33 000 тенгедан бошланиб, 50 000 тенгегача боради.
Астана, Атирау ва Семейдаги нархлар бошқа жойларга қараганда юқори. Бу шаҳарларда бир грамм қимматбаҳо металнинг нархи 40 минг тенгедан бошланиб, 80 минг тенгегача боради.
Шу билан бирга, ҳали ҳам дўконларда 583 пробалик олтин маҳсулотларини топиш мумкин. Бу безаклардаги олтиннинг бир грамми нархи 17 000 тенгедан бошланиб, 44 000 тенгегача боради.
Чимкентда 583 пробалик тоза олтиннинг бир грамми — 17 минг тенге. Таразда эса 43 000 тенге деб кўрсатилган. Қозоғистоннинг бошқа шаҳарларида эса нарх 20 000 тенгедан 35 000 тенгегача.
Эслатиб ўтамиз, 2024 йилда энг кўп олтин қуйма сотилган ҳудудлар: Алмати (32 735 дона, 69 фоиз), Чимкент (5,2 минг дона, 11 фоиз) ва Қарағанди (2209 дона, 5 фоиз).
