Қозоғистон бу йил коинотга ўзининг ракетасини учиради

ASTANA. Kazinform – Қозоғистон йил охирида коинотга ўзининг ракетасини учиради. Ҳозир бунинг учун маблағ ажратилиб, тайёргарлик ишлари бошланган. Бу ҳақда Қозоғистон Республикаси Парламенти Сенати депутати Ғалиасқар Сарибаев маълум қилди.

«Ҳозирда биз ўзимизнинг ракетамизни учириш учун майдонча тайёрлаяпмиз. Бунинг учун маблағ ажратилган. Ҳукумат бу таклифни қўллаб-қувватлади. Бу тижорат дастури. Агар биз уни шу тарзда учирсак, келажакда бизнинг ракеталаримиздан кўпроқ мамлакатлар фойдаланишни хоҳлайди. Ҳозирда Африка давлатлари ва Мўғулистон қизиқиш билдирмоқда. Давлат раҳбари ҳар гал бирор давлатга ташриф буюрганида космик соҳа ҳақида гапиради. У Францияга сафари чоғида коинот ҳақида ҳам гапирди. Мўғул космик кемасини космосга чиқаришга буюртма бериш бўйича шартнома имзоланди. Яъни, йил охиригача биз ўзимизнинг маҳаллий ракета-ташувчини ишлаб чиқарамиз ва мен Қозоғистон космик соҳада ўзининг янги тарихини ёзишига ишонаман”, – деди депутат.

У тўртинчи қозоғистонлик астронавт яқин 5-10 йил ичида коинотга учиши мумкинлигини айтди.

«Халқимизга керакли илмий изланишлар олиб борадиган фуқароларни бугундан тайёрлашни бошлашимиз керак. Бунинг сабаби шундаки, битта космонавтни тайёрлаш учун катта маблағ керак бўлади. Мутахассисларнинг фикрича, битта астронавтни коинотга учиришга тўлиқ тайёрлаш учун тахминан 60 миллион доллар керак бўлади. Биз эса 7-10 йилдан кейин тадқиқот олиб борадиган космонавтларни тайёрлаймиз. Келажакда, яъни 5-10 йилдан сўнг тўртинчи қозоғистонлик космонавтни учириш имконига эгамиз», – дейди Ғалиасқар Сарибаев.

Сенатор, шунингдек, мамлакат учун космик индустрияни ривожлантиришнинг афзалликларини таъкидлади.

«Келажакда ушбу космик соҳага сармоя киритсак, бу бизга 2-3, ҳатто 5 баробар иқтисодий фойда келтиради. Сабаби, бошқа давлатлар, жумладан, бутун Марказий Осиё ва Африка мамлакатлари ҳам бизнинг ракеталаримиз ёрдамида коинотга ўз қурилмаларини учирмоқчи. Бу имкониятдан тўғри фойдаланишимиз керак», – дейди депутат.