Косово НАТОга аъзо бўлишга интилаяпти
ASTANA. Kazinform – Косово президенти Вьоса Османи мамлакатининг НАТОга аъзо бўлиш учун барча имкониятларни ишга солганини маълум қилди, деб хабар беради Аnadolu.
“Энди навбат НАТОда – у ўз эшикларини Косово каби ҳамкорлар учун очиши керак. Косово аллақачон умумий қадриятларимизни ҳимоя қилиш ва глобал хавфсизликка ҳисса қўшиш бўйича ўз улушини қўшиб келмоқда”, – деди Османи.
АҚШнинг Дейтон шаҳрида бўлиб ўтган НАТО Парламент ассамблеяси йиғилишидаги нутқида Вьоса Османи жаҳон тартиби ҳозирги низолар таъсирида қайта шаклланаётганини таъкидлади.
Унинг сўзларига кўра, Украинадаги уруш тинчлик ҳеч қачон кафолатланмаслигини яна бир бор эслатди:
“Бирдамлик ўзи-ўзидан сақланиб қолмайди. Биз бу альянсни замонамизнинг мураккаб таҳдидларига стратегик ва самарали жавоб бера оладиган кучга қандай айлантирамиз?”
Президент Косово миллий маҳсулотининг 2 фоизини мудофаа соҳасига ажратаётганини таъкидлади:
“Яқин йилларда бу кўрсаткични икки баравар ошириш ниятимиз бор. Чунки мураккаб шароитда қўлга киритилган тинчликни ҳимоя қилиш – бизнинг энг муҳим вазифаларимиздан бири. Энди НАТОнинг вазифаси – Косово каби кўпдан бери умумий хавфсизлик учун ҳисса қўшаётган ҳамкорларга эшик очишдир”, – дея қўшимча қилди у.
